Isroil va Janubiy Sudan falastinliklarni ko‘chirishni muhokama qilmoqda

Isroil va Janubiy Sudan rasmiylari G‘azo sektoridan falastinliklarni Janubiy Sudanga ko‘chirish masalasida muzokaralar olib bormoqda. Bu haqida Zamin.uz xabar berdi.

Hozircha bu borada hech qanday rasmiy kelishuvga erishilmagan, ammo suhbatlar davom etmoqda. Rejaga ko‘ra, ikki yildan beri urush ta’sirida qolgan G‘azodagi aholi siyosiy va etnik mojaro mavjud bo‘lgan Janubiy Sudanga ko‘chirilishi mumkin.

Biroq, bu g‘oya falastinliklar va ko‘plab xalqaro hamjamiyat tomonidan qattiq tanqid qilinmoqda. Isroil bosh vaziri Benyamin Netanyaxu G‘azoda harbiy nazoratni kuchaytirishni va falastinliklarning hududni ixtiyoriy tark etishini taklif qilgan.

Falastin rahbarlari esa bu taklifni 1948-yildagi “Nakba” voqeasi bilan taqqoslab, qat’iyan rad etdi. Janubiy Sudan Tashqi ishlar vazirligi esa dastlab bunday rejalarga oid xabarlarni asossiz deb atagan.

Ammo ma’lumotlarga ko‘ra, o‘tgan oy Isroilda Janubiy Sudan tashqi ishlar vaziri bilan uchrashuv chog‘ida bu masala muhokama qilingan. Isroil Tashqi ishlar vaziri o‘rinbosari Sharren Haskel esa yaqinda Juba shahrida bo‘lib o‘tgan uchrashuvlarda falastinliklarni ko‘chirish haqida gap bo‘lmagani, uchrashuvlar asosan tashqi siyosat, xalqaro tashkilotlar va Janubiy Sudandagi gumanitar vaziyatga bag‘ishlanganini ma’lum qildi.

Hozirgi vaqtda bu masala xalqaro hamjamiyatning diqqat markazida bo‘lib, uning yechimi uchun ko‘proq muloqot va muzokaralar zarur.