Diomede orollari AQSh va Rossiyani yaqinlashtiradi
Alyaskadagi Bering bo‘g‘ozida joylashgan Diomede orollari AQSh va Rossiya davlatlari o‘rtasidagi yaqinlikni aniq ko‘rsatadi. Bu haqida Zamin.uz xabar berdi.
Bu ikki kichik orol — Kichik Diomede (AQSh hududi) va Katta Diomede (Rossiya hududi) orasida atigi to‘rt kilometr masofa mavjud. Ularni dengiz suvlari va xalqaro sana chizig‘i ajratib turadi.
Shu sababli, orollardan biri “kecha” deb, ikkinchisi esa “ertaga” deb ataladi. Kichik Diomede orolida taxminan sakson kishi istiqomat qiladi.
Ularning asosiy mashg‘uloti baliq ovlash va dengiz hayvonlarini tutishdan iborat. Orolda do‘kon, maktab va bir nechta turar joylar mavjud.
Katta Diomede esa yashash uchun yopiq hudud hisoblanadi, u yerda faqat Rossiya chegara qo‘shinlari faoliyat yuritadi. Ilgari bu ikki orol aholisi erkin harakatlanib, savdo qilgan, qarindoshlar sifatida birga yashagan.
Biroq 1948-yilda Sovet Ittifoqi Katta Diomededagi aholini ko‘chirib, chegarani yopdi. Bu chora “Muz pardasi” deb atalgan siyosiy to‘siq oilalarni ham ajratib qo‘ydi.
Faqat 1988-yilda qisqa muddatga aloqalar tiklandi. Bugungi kunda Rossiya va AQSh o‘rtasidagi siyosiy munosabatlar murakkab bo‘lsa-da, Diomede orollari ikki mamlakat o‘rtasidagi tarixiy va madaniy bog‘liqlikning yorqin timsoli bo‘lib qolmoqda.
