Yevropa yetakchilari Ukraina uchun yangi sammit tayyorlaydi
Yevropa davlatlari rahbarlari Tramp va Putin o‘rtasida bo‘lib o‘tgan sammitdan so‘ng qo‘shma bayonot bilan chiqishdi. Bu haqida Zamin.uz xabar berdi.
Fransiya prezidenti Emmanuel Makron, Germaniya kansleri Fridrix Mers, Buyuk Britaniya bosh vaziri Kir Starmer, Italiya bosh vaziri Jorja Meloni hamda Polsha yetakchisi Donald Tusk sammit natijalari yuzasidan o‘z fikrlarini bildirdi. Ularning ta’kidlashicha, Yevropa hamkorligi va yordami asosida uch tomonlama yangi sammit tashkil etish imkoniyati ustida ish olib borishga tayyorlik mavjud.
Bayonotda ayniqsa Ukraina masalasi alohida qayd etildi. Yevropa yetakchilari Ukraina qurolli kuchlari hech qanday cheklovlarsiz qo‘llab-quvvatlanishi kerakligini ta’kidlashdi.
Shuningdek, Ukraina Yevropa Ittifoqi yoki NATOga qo‘shilish yo‘lida Rossiyaning veto huquqiga ega bo‘lmasligi zarurligi qayd etildi. Ukraina o‘z hududlari yuzasidan mustaqil qaror qabul qilish huquqiga ega bo‘lishi lozimligi ham bayonotda alohida ta’kidlandi.
Tashqi bosim yoki majburiy shartlar qo‘yilishi qat’iyan rad etildi. Yevropa davlatlari Ukrainaga yordam berishda davom etishini tasdiqladi.
Adolatli va barqaror tinchlik o‘rnatilgunga qadar Rossiyaga nisbatan joriy etilgan sanksiyalar va iqtisodiy bosim yanada kuchaytiriladi. Ushbu qo‘shma bayonot Moskva uchun aniq signal sifatida qabul qilinmoqda.
Ukrainaga ko‘rsatiladigan yordam orqali qit’a xavfsizligini mustahkamlash va uzoq muddatli tinchlikka erishish asosiy maqsad qilib belgilandi.
