Buyuk Britaniyada haydovchilarga yangi cheklovlar joriy etiladi

Buyuk Britaniyada yo‘l harakati qoidalari va xavfsizlik tizimiga jiddiy o‘zgarishlar kiritilishi rejalashtirilmoqda. Bu haqida Zamin.uz xabar berdi.

Yangi tartiblarga ko‘ra, 70 yoshdan oshgan haydovchilar uchun qo‘shimcha cheklovlar joriy etiladi. Ular har uch yilda bir marta ko‘rish qobiliyatini majburiy tekshiruvdan o‘tkazishi shart bo‘ladi.

Agar ko‘rish sifati qoniqarsiz deb topilsa, bunday haydovchilarga avtomobil boshqarish taqiqlanadi. Bu haqda Telegraph nashri ma’lumot berdi.

Yangi strategiya nafaqat ko‘rish bilan bog‘liq cheklovlarni, balki boshqa xavfsizlik choralarini ham o‘z ichiga oladi. Masalan, spirtli ichimlik iste’moli darajasi sezilarli darajada pasaytiriladi.

Shuningdek, xavfsizlik kamari taqmagan yo‘lovchi bo‘lsa, haydovchiga jarima ballari qo‘llanadi. Ushbu o‘zgarishlar yilning kuz oylarida kuchga kirishi kutilmoqda.

Mutaxassislar ta’kidlashicha, bu choralar asosan ko‘rish qobiliyati sustlashgan haydovchilarga bog‘liq yo‘l-transport hodisalari va o‘lim holatlarini kamaytirishga qaratilgan. Yangi tizim doirasida demensiya kabi og‘ir kasalliklarni aniqlash uchun qo‘shimcha tibbiy ko‘riklar ham joriy etiladi.

Bundan tashqari, sug‘urtasiz transport vositasini boshqarishga qarshi qat’iyroq jazolar belgilanadi. Davlat raqamlarining kuzatuv kameralari tomonidan aniqlanmasligi muammosini hal etish bo‘yicha ham chora ko‘rilmoqda.

Transport vazirligi ma’lumotiga ko‘ra, ushbu o‘zgarishlar mamlakat yo‘llarida halokatlar va o‘limlar sonining ortib borayotganligi sababli ishlab chiqildi. Yangi qoidalarning asosiy maqsadi – yo‘l harakati xavfsizligini yaxshilash, qonunbuzarliklarga qarshi qat’iy choralar ko‘rish va harakat tartibini mustahkamlashdir.

Mutaxassislarning fikricha, bu cheklovlar nafaqat yirik shaharlarda, balki butun mamlakat bo‘ylab yo‘l harakati madaniyatini yangi bosqichga olib chiqishi mumkin. Shu tariqa, yo‘l harakati xavfsizligi darajasi sezilarli darajada oshadi va halokatlarning oldi olinadi.