Tojikiston hukumati folbinlik va sehrgarlikka qarshi kurashni kuchaytirish maqsadida mamlakat parlamentiga yangi qonun loyihasini taqdim etdi. Bu haqida Zamin.uz xabar berdi.
Ushbu taklifga ko‘ra, folbinlar va sehrgarlarga murojaat qilgan shaxslarga jarima solinadi. Bu holatlar ijtimoiy xavfsizlik uchun jiddiy tahdid sifatida baholanmoqda.
Taklif qilingan o‘zgarishlarga binoan, Ma’muriy javobgarlik to‘g‘risidagi kodeksning 482-moddasiga yangi band qo‘shiladi. Unda folbin yoki sehrgarga murojaat qilganlarga 5 dan 10 baravargacha jarima solinishi, jarima miqdori esa 40 dan 80 dollargacha belgilanishi ko‘zda tutilgan.
O‘tgan yil davomida Tojikiston hukumati ezoterik xizmatlar ko‘rsatadigan shaxslarga qarshi choralarni kuchaytirdi. Ichki ishlar vazirligi folbinlar va sehrgarlarga murojaat qilgan fuqarolarni hokimiyat organlariga chaqirish va ularning ma’lumotlarini maxsus bazaga kiritishni yo‘lga qo‘ydi.
Bu chora folbinlik va sehrgarlikning oldini olishga qaratilgan. 2024 yilda ham folbinlik va sehrgarlikka qarshi jazolar kuchaytirildi.
Ma’muriy javobgarlik to‘g‘risidagi kodeksga kiritilgan o‘zgartirishlarga ko‘ra, jarimalar oshirildi va ma’muriy qamoq muddati 10 kundan 15 kungacha uzaytirildi. Ayniqsa, folchinlik va sehrgarlik kabi noqonuniy faoliyatlarga nisbatan jazolar qat’iylashtirildi.
Ichki ishlar vazirligi ma’lumotlariga ko‘ra, 2023 yilning birinchi yarmida 495 ta fol ochish va sehrgarlik bilan bog‘liq holatlar aniqlangan. Bu ko‘rsatkich folbinlik va sehrgarlikning jamiyatda keng tarqalganligini bildiradi va davlat organlari tomonidan bu illatga qarshi muntazam monitoring olib borilayotganini tasdiqlaydi.
Tojikiston hukumati ushbu choralar orqali jamiyatdagi barcha fuqarolarni folbinlik va sehrgarlikdan uzoq turishga chaqiradi hamda ijtimoiy xavfsizlikni ta’minlashni maqsad qilgan qat’iy qadamlar tashlamoqda.
