Istanbul shahrining Umraniya tumanida 33 yoshli O‘zbekiston fuqarosi Nigina Sattorova eri tomonidan pichoqlanib vafot etdi. Bu haqida Zamin.uz xabar berdi.
Hodisa Aytosh ko‘chasida sodir bo‘ldi. Guvohlarning ma’lumotiga ko‘ra, 1992 yilda tug‘ilgan ayol turmush o‘rtog‘i tomonidan rashk sababli omma oldida bo‘ynidan pichoqlangan.
Tez yordam xizmati yetib kelganda, ayol allaqachon hayotdan ko‘z yumgan edi. Hodisa yuz berganidan so‘ng, qotillikda gumon qilingan ikki kishi ushlangan.
Ma’lumotlarga ko‘ra, ayolning eri jinoyatdan so‘ng do‘stiga qo‘ng‘iroq qilib, o‘rmon hududiga qochishga harakat qilgan. Politsiya tezkor harakat qilib, keng qamrovli qidiruv o‘tkazdi va qisqa vaqt ichida gumonlanuvchi hamda uning do‘stini qo‘lga oldi.
Hozirda marhumaning jasadi sud-tibbiy ekspertizaga yuborilgan. Hodisa bo‘yicha tergov ishlari davom etmoqda.
