Qirg‘izistonda manzil-koloniyalar tugatiladi, probatsiya kengaytiriladi
Qirg‘iziston Respublikasida manzil-koloniyalarni tugatish va jazoni ijro etish tizimini modernizatsiya qilish bo‘yicha qaror qabul qilindi. Bu haqida Zamin.uz xabar berdi.
Bu haqda 19-avgust kuni o‘tkazilgan brifingda mamlakat adliya vaziri Ayaz Bayetov ma’lum qildi. Uning so‘zlariga ko‘ra, mamlakatda qamoqxonalar va manzil-koloniyalar mavjud bo‘lib, ammo mahkumlar manzil-koloniyalarga borishni istamay qolgan.
Avval ular faqat ro‘yxatdan o‘tish va nazorat uchun manzil-koloniyalarga borgan. Keyinchalik probatsiya tizimi joriy qilingach, ikki tizim bir-birini takrorlay boshlagan.
Shuningdek, kadrlar yetishmovchiligi ham muammo sifatida yuzaga kelgan. Shu sababli, endi manzil-koloniyalar tugatilib, barcha mahkumlar probatsiya tizimiga o‘tkaziladi.
Vazirning ma’lumotlariga ko‘ra, 10 dan ortiq manzil-koloniya yopilishi rejalashtirilgan. Tegishli farmonni 4-avgust kuni Qirg‘iziston prezidenti Sadir Japarov imzolagan.
Ushbu qaror mamlakat jazoni ijro etish tizimini soddalashtirish, resurslardan samarali foydalanish hamda mahkumlarni jamiyatga integratsiya qilishga qaratilgan. Yangilangan tizim mahkumlarning nazoratini yaxshilash va ularning jamiyatga qaytishini osonlashtirishga yordam beradi.
Shunday qilib, Qirg‘izistonda jazoni ijro etish tizimining samaradorligi oshiriladi va zamonaviylashtiriladi.
