Xitoyda qiz sevgilisini firibgarlarga sotdi

Xitoyda yuz bergan ushbu voqea nafaqat mahalliy, balki xalqaro jamoatchilikni ham hayratda qoldirdi. Bu haqida Zamin.uz xabar berdi.

17 yoshli qiz o‘zining 19 yoshli sevgilisini Myanmadagi firibgarlarga 14 ming dollar evaziga qul sifatida sotganligi haqida “Thaiger” nashri xabar berdi. Bu holat yoshlikdagi sevgi va ishonchning qanday salbiy oqibatlarga olib kelishi mumkinligini yana bir bor ko‘rsatdi.

Ma’lumotlarga ko‘ra, yigit va qiz billiardxonada tanishgan. Suhbat davomida qiz Myanmadagi badavlat ota-onasi haqida maqtanib, yigitga ish topishda yordam berishni va’da qilgan.

Yigit bu va’daga ishonib, fevral oyida sevgilisi bilan birgalikda Bangkok shahriga yo‘l olgan. Tailand va Myanma chegarasiga yetgach, ular o‘rtasida janjal yuzaga kelgan.

Shu paytda yigitga qurollangan shaxslar hujum qilib, uning telefon va pasportini tortib olgan. Keyingi to‘rt oy mobaynida yigit asirlikda saqlangan, unga doimiy ravishda qiynoqlar qo‘llanilgan: sochlari qirib tashlangan va onlayn firibgarlikda ishlashga majbur qilingan.

Me’yorlarga rioya qilmasa, uning beliga temir tayoq bilan urilgan. Bu qiynoqlar natijasida yigit 10 kilogrammdan ortiq vazn yo‘qotgan va qisman eshitish qobiliyatini yo‘qotgan.

Bosqinchilar yigitning oilasi bilan bog‘lanib, 48 ming dollar miqdorida tovon talab qilgan. To‘rt oy ichida kerakli mablag‘ to‘plangach, yigit ozod qilingan.

Shu vaqt mobaynida qiz Tailandda bo‘lgan va Xitoyga qaytgach, qo‘lga olingan. Hozirda u firibgarlik va odam savdosi bo‘yicha sudda javob bermoqda.

Jabrlanuvchining singlisi voqeani eslab, “U atigi 17 yoshda edi. Kim o‘ylabdi, u bunday yovuzlikka qo‘l uradi deb?

Bunday jirkanch ishlarni qilishi mantiqqa sig‘maydi”, dedi. Ushbu holat yoshlar orasidagi ishonch, muhabbat va xavfli munosabatlar masalasini yana bir bor dolzarb muammo sifatida ko‘rsatdi.

Ma’naviy tarbiya, shaxsiy xavfsizlik va oilaviy munosabatlar haqida chuqur o‘ylash zarurati bunday fojiali voqealardan so‘ng yanada oshadi.