Mazoriy Sharifda Navoiy haykali buzilgani tasdiqlandi
O‘zbekiston Tashqi ishlar vazirligi Mazoriy Sharif shahrida Alisher Navoiy haykalining buzilgani haqidagi xabarlardan so‘ng Afg‘oniston rasmiylari bilan bog‘landi. Bu haqida Zamin.uz xabar berdi.
Vazirlik ushbu holat yuzasidan rasmiy bayonot berdi. Ma’lumotlarga ko‘ra, haykal joylashgan hudud buyuk mutafakkir xotirasiga mos kelmagani sababli, mahalliy hokimiyat uni buzib tashlagan.
Shu bilan birga, shoir va mutafakkir uchun yanada chiroyli majmua qurilishi rejalashtirilmoqda. Afg‘oniston Madaniyat vazirligi bu ishlar haqida oldindan xabardor qilinmaganini ma’lum qildi.
Kobul voqeadan afsusda ekanini bildirgan va Alisher Navoiyning sharafiga yangi haykal hamda unga atalgan maydon barpo etilishini e’lon qilgan. Afg‘oniston tomoni buyuk mutafakkir xotirasini saqlashga sodiqligini ta’kidlab, uning nomini munosib tarzda e’zozlash uchun barcha zarur choralar ko‘rilishini bildirgan.
Eslatib o‘tamiz, Tolibon hokimiyatga kelganidan keyin Afg‘onistonda Navoiyga oid bir nechta obidalar shikastlangan. 2023 yilda uning barelyefi va grafitiga zarar yetkazilgan, O‘zbekiston Tashqi ishlar vazirligi esa bu holatdan afsusda ekanligini bildirgan edi.
Ushbu voqea buyuk shoir va mutafakkirning xotirasini hurmat qilishga qaratilgan sa’y-harakatlarning davom ettirilishini taqozo etadi.
