Qirg‘izistonda tibbiyotda choy puli qonuniy bo‘ladi

Qirg‘izistonda tibbiyot xodimlariga “choy puli” berishni qonuniylashtirish bo‘yicha yangi taklif muhokama qilinmoqda. Bu haqida Zamin.uz xabar berdi.

Adliya vaziri Ayaz Bayetov 19 avgust kuni o‘tkazilgan idoralararo komissiya yig‘ilishida “ixtiyoriy qo‘shimcha to‘lov” tizimini joriy etish taklifini ilgari surdi. Vazirning ta’kidlashicha, bu tizim to‘liq shaffof bo‘lishi kerak.

To‘lovlar faqat kassalar orqali amalga oshirilishi, xizmat ko‘rsatilgandan keyin to‘lanishi va belgilangan chegaradan oshmasligi lozim. Ayaz Bayetov “ofitsiantga beriladigan choychaqa yaxshi odat, vrachga beriladigan esa pora hisoblanadi” degan fikrni noto‘g‘ri deb baholadi.

U to‘lov tizimining tijoratlashib ketmasligi uchun bemorlardan xizmat ko‘rsatilishidan oldin pul talab qilinmasligi zarurligini ta’kidladi. Shuningdek, bemorlar to‘lovdan voz kechishi mumkinligi, “ixtiyoriylik” haqidagi hujjatlar xizmatdan keyin imzolanishi kerakligi aytildi.

Sog‘liqni saqlash vaziri Erkin Checheybayev ham bu taklifni qo‘llab-quvvatlab, to‘lovlar faqat ixtiyoriy ravishda va kassalar orqali amalga oshirilishi lozimligini qayd etdi. Unga ko‘ra, yig‘ilgan mablag‘ning bir qismi shifoxonani rivojlantirishga, qolgan qismi esa shifokorlar, hamshiralar va sanitar xodimlarni moddiy rag‘batlantirishga sarflanishi mumkin.

Ushbu tashabbus tibbiyot sohasida poraxo‘rlikning oldini olish va xizmat sifatini oshirishga qaratilgan.