Isroil G‘azo shahrini nazoratga olishni boshladi
Isroil mudofaa kuchlari G‘azo shahrini to‘liq nazorat qilish rejasining birinchi bosqichini boshlaganini e’lon qildi. Bu haqida Zamin.uz xabar berdi.
Harbiylar shahar chekkalarida allaqachon joylashganini ma’lum qildi. Bu operatsiya mudofaa vaziri Isroil Katz tomonidan tasdiqlangan bo‘lib, yaqinda xavfsizlik kengashida ham muhokama qilinadi.
Sentabr boshidan boshlab taxminan 60 ming zaxira askar safarbar etilishi rejalashtirilgan. Harbiy ma’lumotlarga ko‘ra, hozirda askarlar Zeitun va Jabaliya hududlarida faoliyat olib bormoqda.
Ushbu joylarda qurol-aslaha saqlangan yerosti tunnelari aniqlangan. Isroil hukumati shahar aholisiga zarar yetkazmaslik maqsadida fuqarolarni evakuatsiya qilish rejasini ham ishlab chiqmoqda.
Biroq, G‘azo tomonidagi vaziyat hanuzgacha murakkabligicha qolmoqda. Hamas Isroilni “aybsiz tinch aholiga qarshi urushni davom ettirishda” ayblamoqda.
G‘azodagi fuqarolik mudofaasining ma’lumotlariga ko‘ra, so‘nggi zarbalarda 25 kishi, jumladan bir oilaning besh a’zosi halok bo‘lgan. Xalqaro hamjamiyat Isroilning bu harakatlaridan xavotir bildirmoqda.
Fransiya prezidenti Emmanuel Makron bu voqealar mintaqani “abadiy urush girdobiga” tortib qo‘yishi mumkinligini ta’kidladi. Qatar va Misr vositachiligida sulh bo‘yicha muzokaralar davom etmoqda.
Hamas 60 kunlik o‘t ochishni to‘xtatish va garovga olinganlarning bir qismini ozod qilish taklifini qabul qilganini bildirdi. Biroq Isroil barcha garovdagilarni ozod etishni talab qilmoqda.
Hozirgacha G‘azoda 62 mingdan ortiq odam halok bo‘lgani ma’lum qilinmoqda.
