Nyu-York sudi Trampga jarimani bekor qildi
Nyu-York apellyatsiya sudi AQSH prezidenti Donald Trampga nisbatan chiqarilgan moliyaviy jarima qarorini bekor qildi. Bu haqida Zamin.uz xabar berdi.
Reuters agentligining xabar berishicha, 2024 yil fevral oyida quyi sud tomonidan belgilangan yuzlab million dollarlik jarima olib tashlandi. Biroq Associated Press ma’lumotlariga ko‘ra, apellyatsiya sudi avvalgi xulosalarning ayrimlarini o‘z kuchida qoldirdi.
Xususan, sud Trampning 2016 yilda birinchi prezidentlik muddatiga saylanishidan oldin uzoq yillar davomida o‘z ko‘chmas mulk va aktivlari qiymatini sun’iy ravishda oshirib ko‘rsatganini tasdiqladi. Bu orqali u kreditorlar va sug‘urta kompaniyalarini Trump Organization uchun qulay shartlar berishga majbur qilgan.
Tramp barcha ayblovlarni qat’iyan rad etdi. Uning advokatlari hisobotlardagi xatolar ahamiyatsizligini ta’kidlab, bu holat hech kimga zarar yetkazmaganini bildirdi.
Avvalgi sud qarorlariga ko‘ra, Tramp 355 million dollar jarima to‘lashi kerak edi. Foizlar qo‘shilganda bu summa 515 million dollardan oshishi mumkin edi.
Apellyatsiya qaroridan so‘ng Tramp katta moliyaviy yukdan ozod qilindi, ammo unga va uning ikki o‘g‘liga korporatsiyalarda rahbarlik qilish taqiqlandi. Sud qarori e’lon qilingach, Donald Tramp buni to‘liq g‘alaba deb baholadi va sudning “noqonuniy va sharmandali qarorni” bekor qilganini ta’kidladi.
2024 yil fevral oyidagi sud qaroridan keyin Tramp Nyu-York bosh prokurori Letisiya Jeymsni o‘z prezidentlik sayloviga to‘sqinlik qilishda ayblagan edi. Apellyatsiya sudi esa Jeymsning harakatlari jamoat manfaatlarini himoya qilish maqsadida amalga oshirilganini qayd etdi.
Reuters agentligi bu qarorni Letisiya Jeyms uchun jiddiy mag‘lubiyat deb atadi. Shu bilan birga, AQSH Adliya vazirligi Letisiya Jeymsga qarshi ipoteka bilan bog‘liq firibgarlik yuzasidan tekshiruv olib bormoqda.
