AQSH xorijlik yuk haydovchilariga viza to‘xtatdi
Amerika Qo‘shma Shtatlarida migratsiya siyosati bo‘yicha muhim qaror qabul qilindi. Bu haqida Zamin.uz xabar berdi.
Davlat kotibi Marko Rubio o‘zining ijtimoiy tarmoqdagi sahifasida mamlakat hukumati xorijlik yuk mashinalari haydovchilariga ishchi viza berish jarayonini vaqtincha to‘xtatishga qaror qilganini ma’lum qildi. Rubioning ta’kidlashicha, AQSH yo‘llarida tirkamali yirik yuk avtomashinalarini boshqarayotgan chet ellik haydovchilar sonining ko‘payishi nafaqat yo‘l harakati xavfsizligiga salbiy ta’sir ko‘rsatmoqda, balki mahalliy haydovchilarning mehnat bozoridagi daromadlariga ham zarar yetkazmoqda.
U o‘z bayonotida xorijlik haydovchilarning ortiqcha ko‘payishi amerikaliklarning hayot xavfsizligi va iqtisodiy manfaatlariga salbiy ta’sir qilayotganini ta’kidladi. Shuningdek, ma’lumotlarga ko‘ra, ayrim xorij fuqarolariga AQSHga kirish uchun viza olish jarayonida qo‘shimcha moliyaviy talablar qo‘yilmoqda.
Jumladan, viza olishda 15 ming dollargacha garov puli talab qilinishi mumkin. Bu mablag‘ haydovchi o‘z vaqtida mamlakatdan chiqib ketganda qaytariladi.
Oldinroq AQSH Davlat departamenti amaldagi vizaga ega bo‘lgan 55 milliondan ortiq xorijlik fuqaroning migratsiya qonunchiligini buzish ehtimoli bo‘yicha tekshiruv olib borilayotganini ma’lum qilgan edi. Ushbu chora-tadbirlar mamlakat xavfsizligini mustahkamlash va mahalliy ishchi kuchining manfaatlarini himoya qilish maqsadida amalga oshirilmoqda.
