G‘azoda 514 ming kishi ocharchilikdan aziyat chekmoqda
BMTning globall ochlikni kuzatish tizimi IPC G‘azo shahri va uning atrofida rasmiy ocharchilik boshlanganini ma’lum qildi. Bu haqida Zamin.uz xabar berdi.
Hozirda 514 ming kishi, ya’ni aholining taxminan to‘rtinchi qismi ocharchilikdan aziyat chekmoqda. Sentyabr oyining oxiriga kelib, bu ko‘rsatkich 641 ming kishiga yetishi kutilmoqda.
BMTning insonparvarlik ishlari bo‘yicha rahbari Tom Fletcher bu fojiani oldini olish mumkinligini ta’kidladi. Biroq, Isroil tomonidan yaratilgan tizimli to‘siqlar sababli oziq-ovqat yordamlari chegaralarda to‘xtab qolmoqda.
Isroil esa bu hisobotni yolg‘on va tarafkashlik deb rad etdi. BMT Bosh kotibi Antoniu Guterrish G‘azodagi ocharchilikni insoniyat uchun fojia deb atab, zudlik bilan o‘t ochishni to‘xtatish va insonparvarlik yordamlarini bemalol yetkazishga chaqirdi.
Ma’lumot uchun, bu IPC tomonidan Afrikadan tashqarida qayd etilgan birinchi ocharchilikdir. Vaziyat Deir al-Balah va Xon Yunis hududlariga ham yoyilishi mumkinligi haqida ogohlantirilmoqda.
G‘azo hududida yuzaga kelgan ocharchilik aholi hayotiga jiddiy xavf solmoqda. Shuning uchun ham xalqaro hamjamiyatning tezkor va samarali harakat qilishi zarur hisoblanadi.
