AQSH qirg‘oqlarida Vibrio bakteriyasi tarqalmoqda
AQSHning qirg‘oqbo‘yi shtatlarida xavfli Vibrio vulnificus bakteriyasining tarqalishi sezilarli darajada oshmoqda. Bu haqida Zamin.uz xabar berdi.
“The Daily Tribune” nashrining xabar berishicha, ushbu bakteriya mamlakatning mashhur plyajlarini to‘liq egallab, aholi sog‘lig‘i uchun jiddiy xavf tug‘dirmoqda. AQSH kasalliklarni nazorat qilish va oldini olish markazlari (CDC) ma’lumotlariga ko‘ra, Florida va Luiziana kabi 11 shtatda infeksiya keng tarqalgan bo‘lib, ularda 20 va 17 nafar bemorning vafot etishi qayd etilgan.
Vibrio vulnificus bakteriyasi iliq sho‘r suvda faol bo‘lib, asosan xom dengiz mahsulotlarini iste’mol qilish yoki ochiq yaralar orqali inson organizmiga kiradi. Har beshinchi holatda zararlanish 48 soat ichida hayot uchun xavfli bo‘lishi mumkinligi aniqlangan.
Mutaxassislar ushbu bakteriyaning tarqalishini global iqlim o‘zgarishi bilan bog‘lamoqda. Suv haroratining ko‘tarilishi bakteriyaning tez ko‘payishiga imkon yaratadi.
Kasallikning dastlabki belgilariga qusish, ich ketishi, terida qichishish yoki pufakchalar paydo bo‘lishi kiradi. Xavf guruhiga immuniteti zaif, yosh va qariylar hamda surunkali kasalliklarga chalingan odamlar kiradi.
CDC aholini ochiq jarohatlar bilan dengiz suviga kirmaslik, dengiz mahsulotlarini yaxshilab pishirish va dengiz suvi bilan aloqadan keyin noxush belgilar paydo bo‘lsa, darhol tibbiy yordamga murojaat qilishga chaqirmoqda. So‘nggi yillarda bu tarqalish AQSHda ikkinchi yirik holat hisoblanadi.
2023 yilda Shimoliy Karolina va Texasda ham shunga o‘xshash bakteriya bilan zararlanish holatlari qayd etilgan edi. Mutaxassislar aholini hushyor va ehtiyotkor bo‘lishga, dengiz mahsulotlarini iste’mol qilishda diqqatni oshirishga chaqirmoqda.
