NASA Psyche zondi Yer va Oy suratini oldi
2023 yil oktyabr oyida NASA tomonidan metallga boy Psixeya asteroidiga uchirilgan Psyche kosmik apparati uzoq koinotdan Yer va Oyning noyob suratini oldi. Bu haqida Zamin.uz xabar berdi.
Zond bu suratlarni taxminan 290 million kilometr masofadan qayd etdi. Iyul oyida missiya jamoasi apparat kameralarini sinovdan o‘tkazib, ularning quyosh nurini aks ettiruvchi obyektlarni aniqlash qobiliyatini tekshirdi.
Sinov uchun sayyoramiz tanlandi. Rasmda Yer Hamal burji fonida kichik nuqta sifatida ko‘rinadi, ammo u aniq ajralib turadi.
Shuningdek, biroz yuqorida soya tushgan Oy ham ko‘rinadi. Ushbu kadr 1990 yilda «Voyajer-1» tomonidan 6 milliard kilometr masofadan olingan mashhur «Oq ko‘k nuqta» suratini eslatadi.
Bu suratlar koinotdagi ulkan masofalar hamda bizning sayyoramizning nozik va kichikligini yanada yaqqol ko‘rsatadi. Missiyaning asosiy maqsadi Mars va Yupiter orbitalari orasida joylashgan Psixeya asteroidini o‘rganishdir.
Olimlar bu obyekt Quyosh tizimidagi sayyoralar shakllanishida ishtirok etgan qadimgi protoplaneta yadrosi bo‘lishi mumkin deb taxmin qilmoqda. Psixeyaning diametri taxminan 280 kilometrni tashkil etadi va u asosiy asteroid kamarining tashqi qismida harakatlanadi.
Kosmik apparat 2029 yil iyul oyida missiya maqsadiga yetguncha taxminan 3,54 milliard kilometr masofani bosib o‘tishi kerak. Zond ko‘rinadigan va infraqizil nurlarni qayd eta oladigan kameralar bilan jihozlangan.
Ushbu texnologiyalar Psixeyaning tarkibini o‘rganish hamda sayyoralar metall yadrolarining shakllanish jarayonlari haqida muhim ma’lumotlar olish imkonini beradi. Missiya natijalari koinot va Quyosh tizimi haqidagi bilimlarimizni yanada boyitadi.
