Daniya podshohligi hukumati yaqinda kitob savdosidan olinadigan 25 foizlik qo‘shimcha qiymat solig‘ini bekor qilish to‘g‘risida muhim qaror qabul qildi. Bu haqida Zamin.uz xabar berdi.
Ushbu qaror jamoatchilikning e’tiborini tortdi va mamlakatda kitobxonlik madaniyatini rivojlantirishga qaratilgan. Maqsad yoshlar va o‘smirlarni ko‘proq kitob o‘qishga rag‘batlantirish hamda madaniy va ma’naviy taraqqiyotga hissa qo‘shishdir.
Hujjatga ko‘ra, soliq bekor qilinishi natijasida kitob narxlari arzonlashadi va ularni xarid qilish imkoniyati kengayadi. Davlat bu qarorni moliyaviy yo‘qotish sifatida emas, balki kelajak avlodning bilim va madaniy darajasini oshirishga qaratilgan investitsiya deb baholamoqda.
Hisobotlarga ko‘ra, soliq bekor qilinishi natijasida davlat xazinasida yiliga taxminan 330 million kron, ya’ni 44 million yevro miqdorida mablag‘ yetishmasligi mumkin. Shunga qaramay, hukumat bu qarorni ijtimoiy foyda uchun muhim deb hisoblaydi.
Bundan tashqari, Iqtisodiy hamkorlik va taraqqiyot tashkiloti (OECD) ma’lumotlariga ko‘ra, Daniyada 15 yoshli o‘smirlarning qariyb 24 foizi oddiy matnni to‘liq tushunib o‘qiy olmaydi. Bu ko‘rsatkich o‘n yil oldingiga nisbatan 4 foizga oshgan.
Shu sababli, kitob solig‘ining bekor qilinishi yosh avlodning o‘qish madaniyatini yaxshilashga qaratilgan muhim qadam sifatida baholanmoqda. Davlat rahbariyati ushbu tashabbus orqali kitobga bo‘lgan qiziqishni oshirish va madaniy rivojlanishni jadallashtirishni maqsad qilgan.
