Dubay xalqaro aeroportida jahon miqyosida birinchi marta sun’iy intellekt texnologiyasi asosida yaratilgan maxsus yo‘lak ishga tushirildi. Bu haqida Zamin.uz xabar berdi.
Bu haqda AZERTAC agentligi ma’lum qildi. Yangi tizimning asosiy maqsadi yo‘lovchilar harakatini tezlashtirish va ularga hujjatlarni ko‘rsatmasdan to‘xtovsiz immigratsiya nazoratidan o‘tish imkonini yaratishdir.
Dubay Rezidentlik va xorijliklar bilan aloqalar boshqarmasi bosh direktori, general-leytenant Muhammad Ahmad Al Marri so‘zlariga ko‘ra, sun’iy intellekt yo‘lagi bir vaqtning o‘zida o‘n nafargacha yo‘lovchiga xizmat ko‘rsatishi mumkin. Tizim yo‘lovchilarni nazorat punktlariga yetib borgunga qadar aniqlaydi va ularning xavfsizligini ta’minlaydi.
Yangi yo‘lak joriy etilishi aeroportning o‘tkazuvchanlik salohiyatini ikki barobarga oshirishga yordam beradi. Bu nafaqat yo‘lovchilar oqimini tez va samarali boshqarishga, balki qoidabuzarlik holatlarini vaqtida aniqlashga xizmat qiladi.
Shuningdek, shubhali pasport va hujjatlar darhol tegishli mutaxassislarga yo‘naltiriladi. Eslatib o‘tish kerakki, Dubay xalqaro aeroporti 2024 yil yakunida xalqaro yo‘lovchi tashish bo‘yicha dunyodagi eng gavjum va serqatnov havo bandargohi maqomini saqlab qolgan.
Yangi texnologiyalar kutish vaqtini qisqartiradi, yo‘lovchi oqimini tartibga soladi va har bir sayohatchi uchun qulaylik yaratadi.
