Xorvatiyalik taniqli g‘avvos Vitomir Marichich suv ostida nafas olmasdan 29 daqiqa davomida turib, dunyo rekordini yangiladi va Ginnesning rekordlar kitobiga kirdi. Bu haqida Zamin.uz xabar berdi.
Bu natija 14 iyun kuni Xorvatiyadagi "Bristol" mehmonxonasi basseynida Ginnesning rasmiy vakillari ishtirokida qayd etildi. Ma’lumotlarga ko‘ra, Vitomir sho‘ng‘ishdan oldin tanasini maksimal darajada tayyorlash uchun maxsus usuldan foydalangan.
U 10 daqiqa davomida toza kislorod bilan nafas olib, organizmini sinovga tayyorlagan. Ushbu jarayon tibbiyotda denitrogenizatsiya deb ataladi.
Bu usul qon tarkibidagi azotni chiqarib, organizmni me’yordan ortiqcha kislorod bilan to‘yintirishga asoslanadi. Natijada kislorod qizil qon hujayralari bilan birga plazmada ham eriydi va tananing havo zaxirasini oshiradi.
Shu sababli suv ostida uzoq vaqt turish imkoniyati paydo bo‘ladi. Vitomir Marichichning rekordi undan oldingi xorvatiyalik g‘avvos Budomir Shobatning ko‘rsatkichidan taxminan besh daqiqa yuqori bo‘ldi.
Shunday qilib, Xorvatiya sportchilari ekstremal sport turlarida yetakchi ekanliklarini yana bir bor isbotladi.
