Shimoliy Koreya harbiylari chegara chizig‘ini kesib o‘tdi

Shimoliy va Janubiy Koreya o‘rtasidagi chegara hududida yana jiddiy voqea yuz berdi. Bu haqida Zamin.uz xabar berdi.

Ryonxap agentligi BMT qo‘mondonligi ma’lumotlariga tayanib xabar berishicha, 19 avgust kuni Shimoliy Koreyaning taxminan 30 nafar harbiy xizmatchisi demarkatsiya chizig‘ini kesib o‘tgan. Bir kun avval Janubiy Koreya shtab boshliqlari birlashgan qo‘mitasi chegara qo‘shinlari bunday holatga javoban ogohlantiruvchi o‘q uzganini ma’lum qilgan edi.

KXDR Bosh shtabi o‘z navbatida chegara yaqinida qurilish ishlari olib borilayotganini bildirdi. Pxenyan ushbu voqeani Janubiy Koreya va AQSHning qo‘shma harbiy mashg‘ulotlari bilan bog‘lab, Seulni mintaqadagi kuchlar muvozanatini buzishda aybladi.

So‘nggi oylarda ikki davlat o‘rtasidagi munosabatlar shiddatli tarzda tarangligicha qolmoqda. Janubiy Koreya yaqinda Shimolga qarshi targ‘ibot uchun ishlatilgan ovozkuchaytirgichlarni olib tashlaganini e’lon qilgan edi.

Biroq bu qadam kutilganidek iliqlik yaratmadi va ikki tomonlama munosabatlarda keskinlik saqlanib qoldi. Muttaxassislar ta’kidlashicha, chegarada sodir bo‘layotgan bunday voqealar mintaqadagi xavfsizlik va barqarorlik masalalarining yanada murakkablashishidan darak beradi.

Xalqaro jamoatchilik hamda kuzatuvchilar navbatdagi qadam qanday bo‘lishini diqqat bilan kuzatmoqda.