Vetnam hukumati mamlakatning bir qancha hududlarida aholini xavfsizlik maqsadida ommaviy evakuatsiya qilish bo‘yicha qaror qabul qildi. Bu haqida Zamin.uz xabar berdi.
Rasmiy ma’lumotlarga ko‘ra, kuchli “Kadziki” to‘foni 25 avgust kuni sohilga yetib kelishidan oldin 586 mingdan ortiq fuqaro xavfli hududlardan ko‘chiriladi. Bu haqda CNBC manbalari xabar berdi.
“Kadziki” to‘foni 20 avgust kuni Filippin yaqinidagi dengizda shakllangan va tez sur’atda kuchayib, Xitoy hamda Vetnam yo‘nalishiga qarab harakat qilmoqda. Hozirda to‘fon shamol tezligi soatiga 200 kilometrga yaqinlashmoqda.
Sinoptiklarning baholashicha, to‘fon sohilga yetib kelganda 300–400 millimetrgacha yog‘ingarchilik keltirishi mumkin. Bu esa suv toshqinlari va ko‘chkilar xavfini oshiradi.
Shuningdek, kuchli shamol ta’sirida dengizdagi to‘lqinlar balandligi 2–4 metrgacha yetishi mumkin. Mintaqada taxminan 60 mingga yaqin kichik qayiq va kema egalari oldindan ogohlantirilgan.
To‘fon nafaqat aholi xavfsizligiga, balki qishloq xo‘jaligiga ham jiddiy zarar yetkazishi mumkin. Mutaxassislar hisob-kitobiga ko‘ra, 300 ming gektardan ortiq guruch maydonlari va 77 ming mevali daraxt plantatsiyalari yo‘qotishlarga uchrashi ehtimoli mavjud.
Vetnamning yirik aviakompaniyalari – Vietnam Airlines va Vietjet Aviation xavfsizlik chorasi sifatida mamlakatning markaziy shaharlariga qaratilgan bir qator reyslarni bekor qilishga majbur bo‘ldi. Mutasaddilarning ta’kidlashicha, bu hodisa so‘nggi yillarda Vetnamda kuzatilgan eng katta tabiiy ofatlardan biri bo‘lishi mumkin.
Shu sababli hukumat barcha resurslarni safarbar qilib, evakuatsiya va qutqaruv ishlarini qat’iy nazorat ostida olib bormoqda.
