Rossiyaning Sankt-Peterburg shahrida odamlarning etnik kelib chiqishini aniqlash imkonini beruvchi maxsus kameralar ishga tushirildi. Bu haqida Zamin.uz xabar berdi.
Axborotlashtirish qo‘mitasi raisi o‘rinbosari Igor Nikonovning ma’lumot berishicha, ushbu texnologiya odamlarning milliy mansubligini aniqlab, ularning shaharning turli hududlarida to‘planishini kuzatishga yordam beradi. Bu yangi tizim huquq-tartibot organlariga jamoat tartibini saqlashda qo‘shimcha imkoniyatlar yaratadi.
Igor Nikonovning ta’kidlashicha, tizim olti xil millatni aniqlashga qodir bo‘lib, ularning to‘planishini tahlil qilish orqali tegishli choralar ko‘riladi. Millatlararo munosabatlar qo‘mitasi rahbari Oleg Kapitanov bu tizimni statistik tahlil vositasi deb atab, uni turli tadbirlarda xavfsizlikni ta’minlashda samarali deb baholadi.
2025-yilga kelib, Sankt-Peterburgda 8 mingta kamera etnik mansublikni aniqlash funksiyasi bilan jihozlanishi rejalashtirilmoqda. Shuningdek, chet el fuqarolarining shaxsiy ma’lumotlari, fotosuratlari va yashash ruxsatnomalarini taqqoslash imkonini beruvchi yangi loyiha ham ko‘rib chiqilmoqda.
Ushbu tizim yordamida shaharda 700 dan ortiq jinoyat fosh qilingani ma’lum qilindi. Texnologiyaning jamoat tartibini saqlashda va jinoyatlarning oldini olishda muhim o‘rin tutishi kutilmoqda.
Biroq, uning insonlarning xususiy hayotiga ta’siri va millatlararo munosabatlarga qanday ta’sir ko‘rsatishi yuzasidan bahs-munozaralar davom etmoqda. Yangi tizim jamiyatda integratsiya jarayoniga qanday ta’sir qilishini kuzatish uchun vaqt talab etiladi.
