Sankt-Peterburgda irqni aniqlovchi kameralar o‘rnatildi
Sankt-Peterburgda insonlarning irqiy va etnik mansubligini aniqlashga mo‘ljallangan kameralar ishga tushirildi. Bu haqida Zamin.uz xabar berdi.
Bu haqda Axborotlashtirish va aloqa qo‘mitasi raisi o‘rinbosari Igor Nikonov ma’lum qildi. Unga ko‘ra, ushbu kameralar ma’lum hududlarda joylashgan guruhlarni aniqlashda yordam beradi hamda huquqni muhofaza qiluvchi organlarga tegishli qarorlar qabul qilishda asos bo‘ladi.
Nikonovning ta’kidlashicha, tizim aynan etnik mansublikni aniqlashga yo‘naltirilgan bo‘lib, undan foydalanib politsiya migrantlar to‘plangan hududlar va “rezina” kvartiralarni nazorat qilish imkoniga ega bo‘ladi. Hozirda 50 mingga yaqin kamera ushbu funksiyaga ega, biroq natijalar hali aniq emas.
Jinoyatlar statistikasi yil oxirigacha aniqlanadi. Tizim oltita irq va millat turini aniqlash imkoniyatiga ega: Kavkaz, Sharqiy Osiyo, Markaziy Osiyo, yevropaliklar, osiyoliklar va negroid irqiga mansub shaxslar.
Bu kameralar shahar aholisi orasidagi etnik munosabatlarni kuzatish va tahlil qilish uchun muhim vosita hisoblanadi. Eslatib o‘tish joizki, Sankt-Peterburgda bunday kameralarni o‘rnatish ishlari 2025 yil fevralida boshlangan.
Shahar millatlararo munosabatlar qo‘mitasi rahbari Oleg Kapitanov sakkiz ming ko‘cha kamerasini “shaxsning etnik mansubligini aniqlash” funksiyasi bilan jihozlash rejalashtirilayotganini bildirgan edi. Yangi texnologiyaning joriy etilishi oxirgi yillardagi migratsiya va etnik munosabatlarning murakkablashuvi fonida ahamiyatli qarorlar qabul qilishda muhim rol o‘ynashi kutilmoqda.
