Deveron daryosi suv darajasi rekord pastga tushdi
Shotlandiyaning Aberdinshir hududida joylashgan Deveron daryosi so‘nggi ellik yil ichida eng past darajaga tushdi. Bu haqida Zamin.uz xabar berdi.
Mutaxassislar bu holatni jiddiy xavf deb baholab, suvdan foydalanishga cheklovlar kiritdi. Endilikda qishloq xo‘jaligi va sanoat korxonalari tabiatdan suv olishni kamaytirishi shart bo‘ladi.
Ushbu qaror daryoni, atrof-muhitni va unga bog‘liq hayotni himoya qilish maqsadida qabul qilindi. Mutaxassislarning ta’kidlashicha, bu holat iqlim o‘zgarishlari natijasida yuzaga kelmoqda.
Agar yaqin kunlarda kuchli yomg‘ir yog‘masa, Sharqiy Shotlandiyadagi boshqa daryolar ham xavf ostida qolishi mumkin. Rasmiy ma’lumotlarga ko‘ra, Shotlandiyaning sharqiy qismidagi suv omborlari odatdagidan ancha past darajada, ya’ni 56 foiz ko‘rsatkichda.
Bu esa aholiga, fermerlarga va tabiiy muhitga qiyinchilik tug‘dirishi mumkin. Mutasaddilar cheklovlar vaqtincha ekanini bildirgan, sharoit yaxshilangach ular bekor qilinadi.
Hozircha odamlar suvdan imkon qadar tejab foydalanishga chaqirilmoqda.
