Janubiy Koreya parlamenti maktablarda dars vaqtida mobil telefonlardan foydalanishni taqiqlovchi qonunni qabul qildi. Bu haqida Zamin.uz xabar berdi.
Ushbu yangi tartib 2026-yil mart oyidan boshlab kuchga kiradi. Qonunning asosiy maqsadi o‘quvchilarni telefon qaramligidan himoya qilish va darslarga diqqatni oshirishdir.
Tadqiqotlar shuni ko‘rsatadiki, koreyalik yoshlarning yarmi smartfonlardan juda ko‘p foydalanadi va bu ularning o‘qish faoliyatiga salbiy ta’sir ko‘rsatmoqda. Endilikda dars paytida telefonlardan foydalanish qat’iyan man etiladi.
Faqat favqulodda vaziyatlarda yoki ta’lim jarayonida zarur bo‘lganda telefonlardan foydalanishga ruxsat beriladi. Maktab hududida o‘qituvchilarga telefonlardan foydalanishni cheklash huquqi beriladi.
Nogironligi bor o‘quvchilar esa maxsus qurilmalardan foydalanish imkoniyatiga ega bo‘ladi. Ota-onalar va o‘qituvchilar bu qarorni qo‘llab-quvvatlamoqda, chunki telefonlar o‘quvchilarning ta’lim olishiga va sog‘lig‘iga zarar yetkazmoqda.
Shu bilan birga, ba’zi mutaxassislar bu qadam muammoni to‘liq hal qilmasligini ta’kidlamoqda.
