Lissabon universiteti olimlari avtomobillar rangining shaharlardagi havo haroratiga ta’sirini o‘rganishdi. Bu haqida Zamin.uz xabar berdi.
Tadqiqot natijalariga ko‘ra, qora rangli avtomobillar quyosh nurini yutib, ko‘proq issiqlik hosil qiladi, oq rangli avtomobillar esa nurni qaytarib, atrofdagi havoni kamroq isitadi. Qora rangli avtomobil atrofidagi havo harorati oq rangli avtomobilga nisbatan 3,8 darajaga yuqori bo‘lgani aniqlangan.
Bu shahar muhitida «issiqlik oroli» deb ataluvchi hodisaning kuchayishiga olib keladi. Issiqlik oroli shahar hududlarida qishloq joylarga qaraganda havo haroratining sezilarli darajada yuqori bo‘lishini anglatadi.
Buning sabablari orasida asfalt va beton yuzalarning issiqlikni uzoq vaqt ushlab turishi, zich qurilishlar tufayli havoning erkin aylana olmasligi, shuningdek, ishlayotgan avtomobillar va sanoat korxonalarining issiqlik chiqarishi mavjud. Ayniqsa, kechasi bu ta’sir kuchayadi, chunki binolar va yo‘llar kun davomida to‘plangan issiqlikni asta-sekin havoga beradi.
Shaharlarda minglab qora rangli avtomobillar kichik issiqlik manbai sifatida harakat qilib, umumiy haroratni oshiradi. Bu esa ayniqsa tirbandlik paytida, mashinalar uzoq vaqt to‘xtab turganda aniq ko‘zga tashlanadi.
Issiqlik oroli effekti aholining salomatligiga salbiy ta’sir qilishi mumkin, ayniqsa, yosh bolalar va keksa insonlar uchun xavfli hisoblanadi. Bu muammoni kamaytirish uchun oddiy choralar qo‘llanilishi mumkin.
Masalan, oq yoki ochiq rangli avtomobillarni tanlash, shahar hududlarida ko‘proq daraxtlar ekish va soya zonalarini yaratish, binolar tomlarini issiqlikni qaytaruvchi qoplamalar bilan ta’minlash, shuningdek, asfalt o‘rniga issiqlikni kam yutadigan materiallardan foydalanish tavsiya etiladi. Bundan tashqari, sanoat va transport sohalarida issiqlik chiqarishni kamaytirish bo‘yicha chora-tadbirlar amalga oshirilishi lozim.
Har bir kichik qadam shahardagi umumiy haroratni pasaytirishga xizmat qiladi va odamlar uchun qulayroq yashash muhitini yaratadi.
