Mirziyoyev Xitoyda Putin bilan uchrashadi
O‘zbekiston Prezidenti Shavkat Mirziyoyev Xitoy Xalq Respublikasida Rossiya Prezidenti Vladimir Putin bilan uchrashadi. Bu haqida Zamin.uz xabar berdi.
Bu haqda Rossiya rahbarining yordamchisi Yuriy Ushakov ma’lum qildi. Ushakovning so‘zlariga ko‘ra, Putin Xitoy rahbari Si Szinpin bilan rasmiy muzokaralarini yakunlagach, bir qator ikki tomonlama uchrashuvlar o‘tkazadi.
Ular orasida O‘zbekiston Prezidenti Mirziyoyev bilan hamkorlikni rivojlantirish va ikki davlat munosabatlarini kengaytirish masalalari muhokama qilinadi. Shavkat Mirziyoyev Si Szinpinning rasmiy taklifiga binoan 30 avgustdan 3 sentyabrgacha Xitoyda rasmiy tashrif bilan bo‘ladi.
Bu tashrif davomida u Tyanszin shahrida o‘tadigan Shanxay Hamkorlik Tashkiloti davlat rahbarlari kengashi va “SHHT plyus” formatidagi sammitda ishtirok etadi. Tadbirlar kun tartibida ko‘p tomonlama hamkorlikni kengaytirish, tashkilot faoliyatini takomillashtirish va strategik yo‘nalishlarni mustahkamlash masalalari ustuvor o‘rin tutadi.
Majlislar yakunida Tyanszin deklaratsiyasi hamda xavfsizlik, raqamli iqtisodiyot, yashil sanoat, energiya, turizm va boshqa sohalarda amaliy sheriklikni rivojlantirishga qaratilgan qo‘shma hujjatlar va qarorlar qabul qilinishi rejalashtirilgan. 2 sentyabr kuni Pekin shahrida Shavkat Mirziyoyev Si Szinpin bilan ikki tomonlama muzokaralar olib boradi.
Shuningdek, u Xitoy rasmiylari va yirik kompaniyalar rahbarlari bilan uchrashuvlarda ishtirok etadi. Ushbu uchrashuvlarda O‘zbekiston va Xitoy o‘rtasidagi strategik sheriklik munosabatlarini mustahkamlash hamda amaliy hamkorlikni kengaytirish masalalari muhokama qilinadi.
Shuningdek, O‘zbekiston Prezidenti 3 sentyabr kuni Ikkinchi jahon urushidagi G‘alabaning 80 yilligiga bag‘ishlangan bayram tadbirlarida ham ishtirok etadi. Xitoy rasmiy axborot agentligi “Sinxua” xabariga ko‘ra, ushbu tantanalarda 26 mamlakat yetakchi va hukumat rahbarlari ishtirok etadi.
Xitoyga birinchi safari bilan tashrif buyuruvchi davlat rahbarlaridan biri Shimoliy Koreya yetakchisi Kim Chen In hisoblanadi. Shuningdek, bayramlarda Kambodja, Vetnam, Laos, Indoneziya, Malayziya, Mo‘g‘uliston, Pokiston, Nepal, Maldiv orollari, Qozog‘iston, O‘zbekiston, Tojikiston, Qirg‘iziston, Turkmaniston, Belarus, Ozarbayjon, Armaniston, Eron, Kongo Respublikasi, Zimbabve, Serbiya, Slovakiya, Kuba va Myanma davlat hamda hukumat rahbarlari ham ishtirok etadi.
Ma’lumot uchun, Xitoyning yapon agressiyasiga qarshi ko‘rsatgan qarshiligi Ikkinchi Xitoy-Yapon urushi deb ataladi. Urush 1931 yilda Yaponiyaning Manchuriyaga bosqini bilan boshlanib, 1937 yilda keng ko‘lamli harbiy harakatlarga aylandi va 1945 yilda Yaponiya taslim bo‘lishi bilan yakunlandi.
Xitoy bu urushda fashizm ustidan g‘alaba qozonishda, yapon qo‘shinlarini uzoq yillar davomida cheklab turishda va xalqaro antifashistik frontni shakllantirishda muhim rol o‘ynagan. Mazkur tashrif O‘zbekistonning xalqaro maydondagi mavqeini mustahkamlashga xizmat qiladi hamda mamlakatning strategik sheriklari bilan munosabatlarini yanada rivojlantirish imkonini beradi.
