Buyuk Britaniyaning mashhur Costa Coffee qahvaxonalari hozirda avvalgidek ko‘p mijoz jalb qila olmayapti. Bu haqida Zamin.uz xabar berdi.
Yoshlar orasida bu tarmoqning mashhurligi kamaymoqda. Asosiy sabab ichimliklarga bo‘lgan didning o‘zgarishi bilan bog‘liq.
Hozirgi kunda ko‘plab yoshlar qahva o‘rniga yashil choydan tayyorlangan matcha ichimliklarini afzal ko‘rmoqda. Raqobatchi qahvaxonalar menyusiga matcha lattelarni qo‘shgan bo‘lsa-da, Costa Coffee hali bunday yangiliklarni joriy qilmagan.
Shu sababli ko‘plab mijozlar Starbucks yoki kichik mustaqil qahvaxonalarga o‘tib ketmoqda. Masalan, Londonda ochilgan Blank Street Coffee qisqa muddat ichida ijtimoiy tarmoqlarda katta mashhurlikka erishdi.
Mutaxassislar fikricha, odamlar oddiy qahvani uyda tayyorlashni afzal ko‘radi, qahvaxonaga esa noodatiy va yangi ta’mdagi ichimliklar uchun boradi. Agar Costa Coffee zamonaviy ichimliklarni taklif qilmasa, u bozorda raqobatchilaridan ortda qolishi mumkin.
Shuningdek, Coca-Cola kompaniyasi bu tarmoqni sotish haqida o‘ylamoqda, chunki 2019 yilda katta summaga sotib olingan ushbu tarmoq hozir kutilgan daromadni bermayapti.
