Rossiya prezidenti Vladimir Putinning Xitoyga qiladigan navbatdagi tashrifi xalqaro siyosat markazida katta ahamiyatga ega bo‘ldi. Bu haqida Zamin.uz xabar berdi.
Bu safar Moskva va Pekin o‘rtasida Ukrainadagi urush bo‘yicha pozitsiyalarni muvofiqlashtirishga qaratilgan. Tashrif doirasida Putin Shanxay hamkorlik tashkiloti sammitida ishtirok etadi, Xitoy rahbari Si Szinpin bilan muhim muzokaralar olib boradi hamda Pekinda Yaponiyaning Ikkinchi jahon urushidagi mag‘lubiyatining 80 yilligiga bag‘ishlangan harbiy paradda qatnashadi.
Ushbu marosimda Shimoliy Koreya yetakchisi Kim Chen In, shuningdek, Eron va Kuba prezidentlari ham asosiy mehmon sifatida ishtirok etishi kutilmoqda. Siyosiy tahlilchilarning fikricha, Putin va Si Szinpin uchrashuvining asosiy mavzusi Ukraina masalasida umumiy pozitsiyani belgilash bo‘ladi.
Kreml Xitoydan keyingi yordamga umid qilmoqda. Shuningdek, agar Amerika Qo‘shma Shtatlari Moskvadan urush harakatlarini to‘xtatishni talab etsa, Xitoyning munosabati qanday bo‘lishi ham muhokama qilinadi.
Ikki davlat o‘rtasidagi iqtisodiy hamkorlik ham kengaytirilishi rejalashtirilmoqda. Xususan, uzoq yillardan beri muhokama qilinayotgan “Sila Sibiri-2” gaz quvuri loyihasi va neft sohasidagi aloqalarni rivojlantirish masalalari kun tartibida turadi.
Jurnalistlar fikricha, uchrashuv harbiy hamkorlikka ham ta’sir qilishi mumkin. Rasmiy ma’lumotlarga ko‘ra, Xitoy Rossiyaga to‘g‘ridan-to‘g‘ri harbiy yordam bermasa-da, AQSh manbalari Pekinning Rossiyaga harbiy sanoatni tiklash uchun zarur uskunalarning katta qismini yetkazib berganini ta’kidlamoqda.
Shu evaziga Xitoy Rossiyadan yuqori texnologiyali mudofaa ishlanmalari bo‘yicha ma’lumotlar olmoqda. Tashrif ramziy jihatdan ham muhim sanaladi.
3 sentyabr kuni Pekindagi harbiy paradda Putin Si Szinpin bilan birga yelkama-yelka o‘tirishi kutilmoqda. Bu 9 may kuni Moskvada o‘tgan G‘alaba paradining o‘ziga xos takroridir.
O‘shanda Xitoy yetakchisi rossiyalik harbiylar bilan birga Qizil maydonda ishtirok etgan edi. Shunday qilib, Putinning Xitoyga tashrifi nafaqat siyosiy, balki iqtisodiy va harbiy sohalarda ham Rossiya va Xitoy munosabatlarini yangi bosqichga olib chiqishi mumkin.
Muzokaralar natijalari Ukrainadagi urushning keyingi yo‘nalishiga jiddiy ta’sir ko‘rsatishi ehtimoldan xoli emas.
