Birlashgan Millatlar Tashkiloti (BMT) Pokistonda migratsiyani samarali boshqarish, odam savdosiga qarshi kurashish hamda inson huquqlarini himoya qilish maqsadida yangi tarmoqni ishga tushirdi. Bu haqida Zamin.uz xabar berdi.
Ushbu tashabbus doirasida Migratsiya bo‘yicha tarmoq (UN Network on Migration – UNNM) rasmiy faoliyatini boshladi. Bu platforma BMTning turli agentliklari, davlat idoralari va fuqarolik jamiyati vakillarini birlashtirib, muammolarga yagona va tizimli yondashuvni ta’minlaydi.
Tarmoq faoliyati 2030 yilgacha mo‘ljallangan Barqaror rivojlanish maqsadlari hamda Global migratsiya kelishuvi asosida yo‘lga qo‘yilgan. Uning asosiy vazifasi migratsiyaning xavfsiz, qonuniy va insonparvar yo‘llar bilan amalga oshishini ta’minlashdan iborat.
BMTning Pokistondagi doimiy koordinatori Muhammad Yahyo UNNM rahbari etib tayinlandi. Uning fikricha, ushbu loyiha migratsiya sohasidagi siyosat va amaliyotlarni yaxshilashga xizmat qiluvchi muhim platforma hisoblanadi.
Muhammad Yahyo ta’kidlaganidek, tarmoq orqali migrantlar manfaatlarini himoya qilish, ularga adolatli munosabatni shakllantirish hamda odam savdosining oldini olish maqsad qilinmoqda. Shu bilan birga, yangi tarmoq doirasida Migratsiya ko‘p sheriklik trast fondi (Multi-Partner Trust Fund – MMPTF) tashkil etildi.
Ushbu fond mamlakatda odam savdosi, inson kontrabandasi va migrantlarga nisbatan huquqbuzarliklarga qarshi kompleks chora-tadbirlarni moliyalashtirishga yo‘naltirilgan. Fond faoliyati "butun jamiyat" yondashuvi asosida olib boriladi, ya’ni unda faqat hukumat emas, balki xususiy sektor, fuqarolik jamiyati tashkilotlari, nodavlat notijorat tashkilotlar va xalqaro tashkilotlar ham mas’uliyatni o‘zaro taqsimlaydi.
Bu tashabbus Pokistonda migratsiya jarayonlarini yanada xavfsiz, qonuniy va insonparvar qilishga xizmat qiladi.
