AQShning Florida shtatida yashovchi bir fuqaro tungi paytda qo‘shnisining avtomobiliga bostirib kirgan o‘g‘rini politsiya kelguniga qadar o‘zi ushlab qoldi. Bu haqida Zamin.uz xabar berdi.
Qiziqarli jihati shundaki, u buni Betmen obraziga o‘xshash pijama kiygan holda amalga oshirdi, deb xabar beradi SCMP nashri. Voqea Keyp Koral shahrida sodir bo‘ldi.
Ertalab soat 2 larda politsiyaga bir nechta avtomobilga hujum qilinganligi haqida xabar kelib tushdi. Gumonlanuvchi 20 yoshli Jastin Shimpl bir nechta mashinani ochib, ichidagi buyumlarni talon-toroj qilgan.
Shu paytda avtomobillardan birining egasi Kayl Myvett uydan chiqishga majbur bo‘ldi. U signal ovozidan uyg‘onib, ko‘chaga chiqqanida o‘g‘rining yuk mashinasini kavlashini ko‘rdi.
Myvett orqadan yetib borib, qaroqchini ushlab qoldi va politsiya yetib kelguniga qadar uni nazoratda ushlab turdi. Huquq-tartibot xodimlari voqea joyiga kelgach, Myvettning jasoratini yuqori baholadi va hattoki u bilan xotira uchun suratga tushdi.
Aniqlanishicha, Shimpl avval ham o‘g‘irlik uchun politsiya nazoratiga tushgan. Bu safargi hibs davomida u uchta yirik va ikkita kichik o‘g‘rilikda ayblanmoqda.
Jinoyatchidan naqd pul, qimmatbaho qo‘l soatlari, 500 dollardan ortiq sovg‘a kartalari hamda umumiy qiymati 300 dollar bo‘lgan ikkita Ray-Ban ko‘zoynak topildi.
