Saudiya Arabistoni davlatga qarashli Saudi Aramco kompaniyasi hamda Iroqning davlat korporatsiyasi SOMO Hindistondagi yirik Nayara Energy kompaniyasiga neft yetkazib berishni chekladi. Bu haqida Zamin.uz xabar berdi.
Ushbu qaror Yevropa Ittifoqining Rossiya bilan hamkorlik qilgan davlatlarga nisbatan kiritgan sanksiyalari natijasida qabul qilinganligi aytilmoqda. Ma’lumotlarga ko‘ra, Nayara Energy kompaniyasining asosiy aksiyalari Rossiyaning Rosneft kompaniyasiga tegishli bo‘lib, u har oyda taxminan uch million barrel Saudiya va Iroq neftini import qilardi.
Biroq avgust oyida vaziyat o‘zgardi va kompaniya faqat Rossiyadan neft oladigan bo‘ldi. Boshqa davlatlarning yetkazib berishni to‘xtatishi sababli ish faqat Moskva bilan chegaralandi.
Natijada, Vadinah shahridagi neft qayta ishlash zavodi ishlab chiqarishni 70-80 foizgacha qisqartirishga majbur bo‘ldi. Bu holat nafaqat ishlab chiqarish hajmiga, balki ichki va tashqi bozorlarda mahsulot yetishmovchiligiga ham ta’sir ko‘rsatdi.
Kompaniya hozirda sotuvdagi qiyinchiliklar va transport muammolarini bartaraf etish uchun yashirin tankerlar – “qora flot” xizmatidan foydalanmoqda. Garchi bunday amaliyot rasmiy qonunlarda taqiqlanmagan bo‘lsa-da, xalqaro bozorda shaffoflik va xavfsizlik masalalarini muhokama qilishga sabab bo‘lmoqda.
Shuningdek, AQSh Hindistonning Rossiyadan neft sotib olishini keskin tanqid qilmoqda. Prezident Donald Tramp avgust oyida Nyu-Delini Moskva bilan aloqalarni cheklamaslikda ayblab, Hindiston mahsulotlariga qo‘shimcha 25 foizlik boj joriy etdi.
Ushbu boj kiyim-kechak, qimmatbaho toshlar, mebel va poyabzal kabi mahsulotlarga ta’sir ko‘rsatdi. Mutaxassislar bu qarorning ikki davlat o‘rtasidagi savdo aloqalariga salbiy ta’sir ko‘rsatishini ta’kidlamoqda.
