Afg‘onistonda kuchli zilzila 850 qurbon berdi

Afg‘onistonda 1-sentyabrga o‘tar kechasi sodir bo‘lgan kuchli zilzila oqibatida qurbonlar soni 850 nafarga yetdi. Bu haqida Zamin.uz xabar berdi.

Shuningdek, 3000 dan ortiq kishi turli darajada tan jarohatlari olib, shifoxonalarga yotqizildi. Bu haqda mamlakat ichki ishlar vazirligi rasmiy bayonot berdi.

Zilzila mahalliy vaqt bilan soat 00:17 da sodir bo‘lib, uning magnitudasi 6,0 ni tashkil etdi. Epitsentri yer yuzidan 10 kilometr chuqurlikda joylashgan edi.

Eng katta zarar Pokiston bilan chegaradosh Kunar va Nangarhor viloyatlarida kuzatildi. Afg‘oniston hukumati vakili Zabihulloh Mujohidning ta’kidlashicha, qurbonlar asosan shu ikki viloyatdagi mahalliy aholi orasida bo‘lib, ko‘pchilik uylaridan ayrilgan va katta yo‘qotishlarga uchragan.

Sog‘liqni saqlash vazirligi matbuot kotibi Sharafat Zamonning so‘zlariga ko‘ra, aholi hayoti va uy-joylari jiddiy zarar ko‘rgan, davlat xalqaro hamkorlar va yordam tashkilotlaridan yordam so‘ramoqda. Hukumat va xalqaro tashkilotlar jabrlanganlarga tezkor tibbiy yordam ko‘rsatish, vayrongarchiliklarni bartaraf etish hamda aholini kundalik hayotga qaytarish uchun zarur choralarni ko‘rmoqda.

Ushbu fojiali voqea Afg‘onistondagi aholi xavfsizligi va hayot sifatini ta’minlash masalasini yana bir bor dolzarb muammo sifatida ko‘rsatdi.