Bolalarga kuchli energetik ichimliklar sotilishi taqiqlanadi
Buyuk Britaniya hukumati 16 yoshgacha bo‘lgan bolalarga kofeinni litrida 150 milligrammdan ortiq miqdorda o‘z ichiga olgan energetik ichimliklarni sotishni taqiqlash bo‘yicha yangi tashabbusni ilgari surdi. Bu haqida Zamin.uz xabar berdi.
Hozirda ushbu masala yuzasidan maslahatlashuvlar davom etmoqda. Rasmiy ma’lumotlarga ko‘ra, energetik ichimliklar bolalar uchun zararli bo‘lib, ularning uyqu tartibini buzadi, diqqatni jamlash qobiliyatiga salbiy ta’sir ko‘rsatadi va umumiy sog‘liq holatiga zarar yetkazadi.
Bundan tashqari, shakar miqdori yuqori bo‘lgan bunday ichimliklar ortiqcha vazn ortishi va semirish xavfini oshiradi. Sog‘liqni saqlash vaziri Ues Stritingning ta’kidlashicha, energetik ichimliklar bolalarning kundalik hayot sifatiga salbiy ta’sir ko‘rsatmoqda.
Uyqusizlik, ruhiy charchoq va diqqatning tarqalishi ularning farovonligini pasaytiradi. Shu sababli, hukumat ushbu mahsulotlarni cheklash choralarini ko‘rmoqda.
Tadqiqotlarga ko‘ra, har kuni kamida 100 ming bola energetik ichimliklarni iste’mol qilmoqda, bu esa ularning o‘quv jarayoni va ruhiy holatiga salbiy ta’sir qilmoqda. Ta’lim vaziri Bridjit Fillipson bu tashabbusni bolalar salomatligini himoya qilish va ularni yomon odatlardan asrash yo‘lida muhim qadam sifatida baholadi.
Unga ko‘ra, taqiq orqali yoshlar sog‘lom turmush tarziga yo‘naltiriladi va kelajak avlodning farovonligi ta’minlanadi. Bu choralar mamlakatda sog‘lom va barkamol avlodni shakllantirishga xizmat qiladi.
