Turkiya Afg‘onistonga 25 tonna yordam yubordi
Turkiya Afg‘onistonda yuz bergan halokatli zilziladan so‘ng insonparvarlik yordamini yubordi. Bu haqida Zamin.uz xabar berdi.
TRT Haberning xabariga ko‘ra, Turkiya Tashqi ishlar vazirligi, Tabiiy ofat va favqulodda holatlar boshqarmasi hamda Turk Qizil Yarim Oy jamiyati hamkorligida tayyorlangan 25 tonnalik yordam Kayseridagi Erkilet aeroportidan harbiy havo kuchlari samolyoti orqali Afg‘onistonga yetkazildi. Yordam yukida vaqtinchalik boshpana qurish uchun zarur materiallar, gigiyena vositalari, oziq-ovqat to‘plamlari va boshqa muhim narsalar mavjud edi.
31 avgust kechasi Afg‘onistonning sharqida joylashgan Kunar viloyatida 6,0 magnitudali kuchli zilzila sodir bo‘ldi. Bu tabiiy ofat natijasida 1400 dan ortiq odam halok bo‘ldi, 3100 dan ziyod kishi tan jarohati oldi va 5412 dan ortiq uy buzildi.
Zilziladan so‘ng Kobul hukumati Turkiyadan yordam so‘rab murojaat qilgan edi. Turkiya tomonidan yuborilgan insonparvarlik yordami mintaqadagi qiyinchiliklarni yengillashtirishga qaratilgan muhim qadam hisoblanadi.
