Rossiya prezidenti Vladimir Putin Moskva va Boku o‘rtasida ba’zi muammolar mavjud bo‘lsa-da, ikki davlat aloqalari uzoq muddatli manfaatlar asosida davom etishini ta’kidladi. Bu haqida Zamin.uz xabar berdi.
Davlat rahbari Xitoyga tashrifi chog‘ida Ozarbayjon prezidenti Ilhom Aliyev bilan qisqa suhbatlashganini ma’lum qildi. Putinning so‘zlariga ko‘ra, mamlakatlar o‘rtasidagi aloqalarda vaqti-vaqti bilan turli masalalar yuzaga keladi, muammolar mavjud bo‘lsa ham ular hal qilinadi.
U Rossiya va Ozarbayjon munosabatlari poydevori mustahkam ekanini, o‘zaro manfaatdorlik asosida barcha muammolar o‘z yechimini topishini ta’kidladi. 3 sentyabr kuni Pekinda SHHT sammiti doirasida Putin va Aliyev boshqa davlat rahbarlari bilan bir nechta ikki tomonlama uchrashuvlar o‘tkazgan, biroq o‘zaro rasmiy uchrashuv bo‘lmagan.
Eslatib o‘tish joizki, Rossiya va Ozarbayjon munosabatlari avval AZAL aviakompaniyasining samolyoti urib tushirilishi va Yekaterinburgda ozarbayjon diasporasi vakillari halok bo‘lishi sababli sovuqlashgan edi. Shu bilan birga, tomonlar aloqalarni mustahkamlashga intilmoqda.
