Buyuk Britaniya Rossiya aktivlaridan Ukrainaga yordam berdi
Buyuk Britaniya mudofaa vaziri Jon Xili Kiyevga tashrifi davomida muzlatilgan Rossiya aktivlaridan foydalanib, Ukrainaga harbiy yordam ko‘rsatishni ma’lum qildi. Bu haqida Zamin.uz xabar berdi.
3 sentyabr kuni Britaniya vaziri Rossiya Federatsiyasidan musodara qilingan mablag‘lar 1 milliard funt sterlingdan ortiq miqdorda qurol-aslaha va boshqa harbiy yordamlarni sotib olishga sarflanganini ta’kidladi. Ushbu mablag‘lar yordamida Ukraina yuz minglab artilleriya o‘q-dorilari, yuzlab zenit-raketa tizimlari, qurollar uchun ehtiyot qismlar olishi mumkin bo‘ldi.
Shuningdek, texnika va harbiy transport vositalariga texnik xizmat ko‘rsatish hamda ta’mirlash bo‘yicha yangi shartnomalar tuzildi. So‘nggi 50 kun ichida Ukraina Buyuk Britaniyadan 4,7 million o‘q-dorilar, 60 ming artilleriya o‘qlari, raketalar va raketa tizimlari, 2,5 mingdan ortiq dronlar, 200 dan ortiq elektron urush tizimlari, 100 dan ortiq yengil qurol, 30 ta harbiy mashina va havo mudofaasiga oid qo‘shimcha jihozlar oldi.
Bu yordamlar Ukrainaning mudofaa salohiyatini oshirishga katta hissa qo‘shmoqda. Buyuk Britaniya hukumati saytining ma’lumotlariga ko‘ra, ushbu harakatlar mamlakatlar o‘rtasidagi harbiy hamkorlikni mustahkamlash va Ukraina xavfsizligini ta’minlashga qaratilgan.
