Isroil G‘azodagi aholiga ko‘chishni buyurdi

Isroil armiyasi G‘azo shahridagi aholiga janubga, Xon Yunus yaqinidagi belgilangan hududga ko‘chishni buyurdi. Bu haqida Zamin.uz xabar berdi.

Rasmiylar bu hududni gumanitar zona deb atab, u yerda oziq-ovqat va tibbiy yordam ko‘rsatilishini ma’lum qilmoqda. Netanyaxu G‘azo shahrini Hamasning asosiy tayanchi sifatida tan olib, uni egallash zarurligini ta’kidladi.

Harbiylar shahar hududining katta qismini nazoratga olganini bildirmoqda. Bu esa yuz minglab odamlarning yana ko‘chishga majbur bo‘lishiga sabab bo‘lmoqda.

Mahalliy sog‘liqni saqlash idoralari urush boshlanganidan beri 64 mingdan ortiq falastinlik halok bo‘lganini ma’lum qildi. Shahar va uning atrofidagi hududlar vayronaga aylangan, aholining aksariyati esa og‘ir gumanitar inqirozda qolmoqda.

Hamas tomonidan garovda ushlab turgan 251 kishidan faqat bir qismi tirikligi aytilmoqda. Netanyaxu barcha garovdagilar ozod qilinishi va Hamas qurolsizlanmaguncha urush to‘xtamasligini bildirdi.

Muzokaralar hozircha natija bermayapti. Voqealar davom etar ekan, xalqaro hamjamiyat gumanitar yordamni oshirish va tinchlik o‘rnatish uchun choralar ko‘rishni davom ettirmoqda.