O‘zbekiston va Afg‘oniston energetika hamkorligini kengaytirdi
2025 yil 6 sentyabr kuni Afg‘oniston poytaxti Qobul shahrida "Afg‘onistonda energetika sektoriga sarmoya kiritish va hamkorlikni rivojlantirish" mavzusida xalqaro energetika forumi o‘tkazildi. Bu haqida Zamin.uz xabar berdi.
Ushbu tadbir mintaqaviy energetika sohasidagi hamkorlikni mustahkamlash, Afg‘onistonning energetika infratuzilmasini yangilash va xorijiy investitsiyalarni jalb etishga qaratilgan edi. Forumda Afg‘oniston hukumati vakillari, O‘zbekiston, Turkmaniston va Tojikiston energetika vazirliklari delegatsiyalari hamda BMT, Yevropa Ittifoqi va boshqa xalqaro tashkilotlar, shuningdek Qobuldagi diplomatik missiyalar rahbarlari ishtirok etdi.
Tadbir davomida O‘zbekiston va Afg‘oniston o‘rtasida 220 dan 500 kilovoltgacha kuchlanishdagi yuqori quvvatli elektr uzatish liniyalari va podstansiyalar qurilishi bo‘yicha moliyaviy shartnoma imzolandi. Bu kelishuv ikki mamlakat orasidagi energetika aloqalarining yangi bosqichga ko‘tarilishini anglatadi.
Loyiha doirasida Afg‘oniston hududida strategik ahamiyatga ega elektr infratuzilmasi obyektlari barpo etiladi. Jumladan, yuqori kuchlanishli elektr uzatish tarmoqlari va podstansiyalar qurilib, mamlakatning markaziy hamda janubiy hududlari barqaror elektr energiyasi bilan ta’minlanadi.
Ushbu loyiha Afg‘onistonning energetika tizimini rivojlantirish va mintaqaviy hamkorlikni mustahkamlashda muhim qadam bo‘ladi.
