Varshavada metro kutubxonasi ochildi, 16 ming kitob mavjud

Polsha poytaxti Varshava shahrida madaniyat va kitobxonlikni rivojlantirish maqsadida yangi loyiha amalga oshirildi. Bu haqida Zamin.uz xabar berdi.

Metro bekatida zamonaviy kutubxona ochildi. “Metroteka” nomli madaniy markaz Targuvek tumanidagi M2 yo‘nalishining Konratovicha bekatida faoliyat boshladi.

Ushbu loyiha shahardagi aholiga va metro yo‘lovchilariga smartfonlardan ko‘ra kitob o‘qishga qiziqish uyg‘otishni, ularga madaniy va dam olish uchun qulay muhit yaratishni maqsad qilgan. Kutubxona ikki bo‘limdan iborat bo‘lib, kattalar va bolalar uchun alohida maydonlar tashkil etilgan.

Shuningdek, ommaviy o‘qish va madaniy tadbirlar uchun maxsus joy ajratilgan. Umumiy maydoni 150 kvadrat metr bo‘lgan Metroteka kutubxonasida taxminan 16 mingdan ortiq kitob mavjud.

Barcha kitoblar kontaktsiz chiplar yordamida “ekspress” tarzda taqdim etiladi. Kitoblarni o‘qib bo‘lgach, ular qayta kutubxonaga yoki 24 soat faoliyat ko‘rsatadigan maxsus qabul qutisiga topshirilishi mumkin.

Metroteka tashrif buyuruvchilarga nafaqat kitob o‘qish, balki noutbukni vaqtincha ishlatish, internetdan foydalanish, shovqindan uzoq tinch muhitda ishlash imkonini ham beradi. Bundan tashqari, bepul qahva va issiq shokolad bilan dam olish imkoniyati ham mavjud.

Loyiha ish boshlagan birinchi kunda 400 dan ortiq kitob tarqatildi. Ularning orasida maktab darsliklari, sayohat uchun qo‘llanmalar, ilmiy va amaliy kitoblar ham bor.

Bu yangi kutubxona Varshava shahrida madaniyat va bilim olishga katta hissa qo‘shadi.