Zelenskiy Putinga Kiyevda muzokara taklif qildi
Ukraina prezidenti Vladimir Zelenskiy Rossiya rahbari Vladimir Putinga muzokaralarni Kiyev shahrida o‘tkazishni taklif qildi. Bu haqida Zamin.uz xabar berdi.
Bu haqda u ABC News telekanaliga bergan intervyusida ma’lum qildi. Zelenskiyning fikricha, Putinning Moskvada uchrashuv tashkil etish taklifi asosan vaqtni cho‘zish maqsadida qilingan taktika hisoblanadi.
Prezidentning so‘zlariga ko‘ra, mamlakat raketa zarbalari va harbiy hujumlar ostida qolayotgan bir paytda u Moskvaga borishga tayyor emas. U “men terrorchilar poytaxtiga qadam qo‘ymayman” deb ta’kidladi.
Zelenskiy shuningdek, oldin rejalashtirilgan Alyaska uchrashuvida ishtirok etmaslik afsusli holat bo‘lganini aytdi. Unga ko‘ra, Putin AQSh prezidenti Donald Tramp bilan uchrashuvda o‘z maqsadlariga mos natijalar olgan.
Ukraina rahbari Rossiyaga qarshi qo‘shimcha iqtisodiy va siyosiy bosim zarurligini ham ta’kidladi. U ayrim hamkorlar Rossiya nefti va gazini sotib olishda davom etayotganini tanqid qildi.
Zelenskiyning fikricha, Rossiyaning asosiy quroli energiya resurslari bo‘lib, bularni sotib olishni to‘xtatish eng samarali choradir. Shuningdek, Zelenskiy xavfsizlik kafolatlari masalasiga ham e’tibor qaratdi.
U mamlakat himoyasini faqat milliy armiyaning ta’minlay olishini aytdi. Donbassdagi Ukraina qo‘shinlarining mustahkam pozitsiyalari mavjudligini qayd etdi va Rossiya ushbu hududni to‘liq egallash uchun katta qurbonlar berishga majbur bo‘lishini ta’kidladi.
Zelenskiy “bufer zona” yaratish g‘oyasini katta xato deb atadi, chunki hozirda amalda 10-20 kilometrli “o‘lim zonalari” mavjud. Unga ko‘ra, Putin Ukraina bilan to‘g‘ridan to‘g‘ri uchrashishdan qochayotgani sababli qabul qilib bo‘lmaydigan takliflarni ilgari surmoqda va bu siyosiy jihatdan yomon qadam hisoblanadi.
