Qatar Isroilning Dohadagi hujumlarini qoraladi
Qatar Tashqi ishlar vazirligi rasmiysi Majid Al-Ansari Isroilning zarbalarini qoraladi. Bu haqida Zamin.uz xabar berdi.
Unga ko‘ra, Isroil hujumlari HAMAS siyosiy byurosi a’zolari yashayotgan turar-joylarga qaratilgan. Vazirlik bayonotida bunday harakatlar xalqaro huquq va me’yorlarni ochiqdan-ochiq buzish ekanligi ta’kidlandi.
Bu hujumlar Qatar fuqarolari hamda mamlakatda istiqomat qiluvchi rezidentlarning xavfsizligiga jiddiy tahdid solmoqda. Qatar hukumati Isroilning mintaqadagi xavfsizlikni izdan chiqarayotgan beparvo siyosatini qattiq qoralab, mamlakat xavfsizligi va mustaqilligiga qarshi qaratilgan har qanday harakatlarga toqat qilmasligini bildirdi.
Vazirlik yuqori darajada tergov ishlari olib borilayotganini ma’lum qildi va yaqin kunlarda qo‘shimcha ma’lumotlar e’lon qilinadi, dedi. HAMAS manbalari Al-Jazeera orqali ma’lum qilishicha, Dohada sulh taklifini muhokama qilayotgan yig‘ilishdagi barcha amaldorlar Isroilning suiqasd urinishidan omon qolgan.
Xabarlarga ko‘ra, Isroil zarbalari aynan Tramp taklif qilgan kelishuvni muhokama qilayotgan guruhni yo‘q qilishga qaratilgan. Isroil hukumati operatsiya uchun to‘liq javobgarlikni o‘z zimmasiga oldi.
Bosh vazir idorasi bayonotida HAMASning yuqori rahbarlariga qarshi zarba mustaqil Isroil amaliyoti ekanligi va uni o‘zlari boshlagani, o‘tkazgani hamda to‘liq mas’ul ekanliklari bildirildi. Shu bilan birga, AQShning Dohadagi elchixonasi xavfsizlik choralarini kuchaytirganini ma’lum qildi.
Eslatib o‘tamiz, 9 sentyabr kuni Qatar poytaxtida bir nechta kuchli portlashlar eshitilgan edi. Jurnalist Barak Ravidning Isroil rasmiylariga tayanib bergan xabarlariga ko‘ra, bu portlashlar HAMAS yetakchilariga qaratilgan suiqasd sifatida amalga oshirilgan.
Natijada, Isroil harbiy-havo kuchlari Dohada HAMAS rahbariyatiga aniq zarba berganini e’lon qildi. Bu voqea Yaqin Sharqdagi keskinlikni yanada kuchaytirib, mintaqadagi siyosiy va harbiy vaziyatni murakkablashtirmoqda.
