Polshada aeroportlar Rossiya dron hujumi sabab yopildi
10 sentyabrga o‘tar kechasi Rossiyaning Ukrainaga amalga oshirgan ommaviy dron hujumlari sababli Polsha hukumati bir qator muhim aeroportlarni vaqtincha yopishga majbur bo‘ldi. Bu haqida Zamin.uz xabar berdi.
Bu qaror “rejadan tashqari harbiy harakatlar” yuzaga kelgani bois qabul qilindi. Xususan, “Jeshuv-Yasenka” va “Lyublin” xalqaro aeroportlari hamda Varshava shahridagi ikkala aeroport harakat uchun yopildi.
Bu haqda aviatsiya xodimlari tomonidan berilgan tezkor va rasmiy xabarda ma’lum qilindi. Polsha aviatsiya departamenti bu choralarni milliy xavfsizlikni ta’minlash va harbiy harakatlardan kelib chiqishi mumkin bo‘lgan xavflarni bartaraf etish maqsadida amalga oshirilayotganini bildirdi.
Shuningdek, Polsha qurolli kuchlari tezkor qo‘mondonligi ijtimoiy tarmoqlarda havo hududini mustahkam himoya qilish uchun barcha zarur choralar ko‘rilganini ma’lum qildi. Xavfsizlikni ta’minlash uchun nafaqat polshalik qiruvchi samolyotlar, balki NATO a’zo davlatlariga tegishli harbiy samolyotlar ham uchirilmoqda.
Quruqlikdagi mudofaa kuchlari ham yuqori tayyorgarlik holatiga keltirildi. Ushbu chora-tadbirlar Polsha hukumati tomonidan mamlakat xavfsizligini va aholi osoyishtaligini ta’minlash maqsadida qabul qilindi.
Shuningdek, “Jeshuv-Yasenka” aeroporti Ukrainaga G‘arb yordamini yetkazishda asosiy logistika markazi bo‘lib xizmat qilgani sababli uning vaqtincha yopilishi xalqaro hamkorlik doirasida ham e’tiborga olinmoqda. Bu holat hududdagi xavfsizlikni ta’minlash va harbiy xavflarni kamaytirishga qaratilgan muhim choradir.
