10 sentyabr kuni Isroil qurolli kuchlari Yaman poytaxti Sano shahriga hamda mamlakatning shimolida joylashgan al-Javf viloyatiga havodan zarbalar berdi. Bu haqida Zamin.uz xabar berdi.
Isroil armiyasi bu hujumlarning asosan harbiy lagerlar, husiylar targ‘ibot boshqarmasi shtabi va yonilg‘i omborlariga qaratilganini ma’lum qildi. Biroq husiylar ushbu da’volarni rad etib, zarbalar fuqarolik infratuzilmalariga qaratilganini bildirdi.
Reuters agentligining xabariga ko‘ra, mazkur havo hujumlari G‘azoda davom etayotgan mojaro fonida Isroil va husiylar o‘rtasidagi qarshi hujumlar silsilasining yangi bosqichi hisoblanadi. Isroil tomoni o‘z bayonotida, bu zarbalar husiylar tomonidan amalga oshirilgan hujumlarga javob sifatida amalga oshirilganini ta’kidladi.
Ular aytishicha, ayni paytda dronlar va yer-yer raketalari Isroil hududiga yo‘naltirilgan edi. Shu bilan birga, husiylar vakillari Isroil harbiy obyektlarini nishonga olgani haqidagi bayonotlarni inkor etdi.
Ularning so‘zlariga ko‘ra, zarbalar sof fuqarolik inshootlariga qaratilgan, jumladan ikki gazeta tahririyatiga ham zarar yetkazilgan. Bu hujumlar natijasida jurnalistlar va oddiy fuqarolar halok bo‘lgan, ko‘plab odamlar jarohat olgan.
Ammo aniq qurbonlar soni haqida ma’lumot berilmadi. Sano shahrining aholisi hujumlarning ikki tog‘ orasida joylashgan va qo‘mondonlik markazi sifatida ishlatiladigan hududga qaratilganini bildirgan.
Guvohlar Isroil zarbalari husiylar mudofaa vazirligini ham nishonga olganini qayd etdi. Yamandagi Husiylar sog‘liqni saqlash vazirligi ma’lumotlariga ko‘ra, ushbu hujumlar natijasida 35 kishi halok bo‘lgan, 131 kishi turli darajada jarohat olgan.
Eronning ko‘magi bilan harakat qilayotgan husiy kuchlari so‘nggi yillarda Qizil dengizdagi tijorat kemalariga va Isroil hududiga qarshi hujumlarni kuchaytirgan. Ular buni G‘azodagi falastinliklarga birdamlik ramzi sifatida tushuntiradi.
Isroil esa o‘z navbatida Yaman hududidagi husiylar nazoratidagi hududlarga, xususan strategik ahamiyatga ega Hudayda portiga muntazam zarbalar berib kelmoqda.
