O‘zbekiston Afg‘onistonga tegishli 57 ta harbiy vertolyotni qaytarishi mumkinligi haqida ma’lumotlar tarqaldi. Bu haqida Zamin.uz xabar berdi.
Afghanistan International nashrining xabariga ko‘ra, ushbu vertolyotlar 2021 yilda Afg‘oniston hukumatining ag‘darilishi vaqtida mamlakatdan olib chiqib ketilgan edi. Sobiq Afg‘oniston armiyasiga qarashli harbiy texnika 2021 yil avgust oyida Tolibon hokimiyatga kelganidan keyin afg‘on harbiy uchuvchilari tomonidan O‘zbekiston va Tojikiston hududiga olib o‘tilgan.
Pentagon ma’lumotlariga ko‘ra, jami 46 ta havo kemasi O‘zbekistonga, yana 18 tasi Tojikistonga joylashtirilgan. Ushbu harbiy texnikalar orasida Mi-17 va UH-60 turidagi vertolyotlar, shuningdek PC-12, C-208, AC-208 va A-29 rusumli samolyotlar mavjud.
Tolibon hukumati o‘tgan yillar davomida bu texnikalarni qaytarishni bir necha bor talab qilgan, ammo Toshkent va Dushanbe rasmiylari masala bo‘yicha aniq bayonot bermagan. Shu bilan birga, AQShning O‘zbekistondagi elchisi 46 ta uchuv apparat yangi kelishuv asosida O‘zbekiston nazoratida qolishini bildirgan.
AQShning Afg‘oniston bo‘yicha elchixonasi Tojikiston hukumatini samolyotlarni Tolibon hukumatiga topshirmagani uchun minnatdorlik bilan e’tirof etgan. Eslatib o‘tish joizki, 2025 yil fevral oyida «Amerika ovozi» nashri O‘zbekistondan 7 ta vertolyot AQShga o‘tkazilgani haqida xabar bergan edi.
Bu holat Tolibon Mudofaa vazirligi tomonidan keskin tanqid qilingan.
