NASA va London Imperial kolleji olimlari Mars yuzasida hayotning dastlabki belgilariga o‘xshash izlarni aniqladilar. Bu haqida Zamin.uz xabar berdi.
Ular Yezero krateridagi jinslarni o‘rganib, ularning tarkibida organik moddalarga va Yerda uchraydigan biokimyoviy jarayonlarga o‘xshash reaksiyalar izlariga duch kelishdi. Ushbu kashfiyot haqida ilmiy maqola nufuzli Nature jurnalida chop etildi.
Olimlar Bright Angel deb ataluvchi yorqin hududdagi toshlarni tahlil qilishdi. Ma’lum bo‘lishicha, bu jinslar tinch suv muhitida, ya’ni ko‘l yoki qirg‘oqda shakllangan cho‘kindi qatlamlaridan tashkil topgan.
Ularning tarkibida temir-fosfat va temir-sulfid bilan boyitilgan mayda tuzilmalar mavjudligi aniqlangan. Mutaxassislar bu tuzilmalar organik uglerod bilan reaksiya natijasida yuzaga kelgan bo‘lishi mumkinligini ta’kidlamoqda.
Yerda bunday jarayonlar ko‘pincha mikroorganizmlar faoliyati bilan bog‘liq bo‘ladi. London Imperial kolleji professori Sanjiv Gupta fikricha, ushbu kashfiyot katta ahamiyatga ega.
Unga ko‘ra, olingan namunalar Marsda biologik jarayonlar mavjud bo‘lganining eng kuchli dalillaridan biridir. 2021 yildan buyon Yezero kraterida faoliyat yuritayotgan Perseverance marsoxodi Bright Angel hududidan namunalar olib, ularni maxsus kapsulada saqlamoqda.
Ushbu namunalar 2030-yillarda Yerga qaytarilishi rejalashtirilgan. Britaniya kosmik agentligi vakili Mettyu Kuk ham mazkur natijalarni yuqori baholadi.
Uning so‘zlariga ko‘ra, olingan ma’lumotlar Marsda mikrob hayoti uchun sharoit bo‘lganini ko‘rsatuvchi eng ishonchli dalillardan biridir. Garchi yakuniy xulosani ehtiyotkorlik bilan chiqarish zarur bo‘lsa-da, bu kashfiyot insoniyatni “Biz koinotda yolg‘izmizmi?” degan asosiy savolga javob topishga bir qadam yaqinlashtiradi.
