Gollandiyaning tinch va osoyishta Ruurlo qishlog‘ida noyob loyiha amalga oshirildi. Bu haqida Zamin.uz xabar berdi.
Bir necha asrlar davomida qishloq aholisi uchun tarixiy ramz bo‘lgan kashtan daraxti qurib qolgan edi. Dastlab, odamlar uni kesib tashlashni o‘ylashdi, chunki qurigan daraxtdan foyda bo‘lmas, degan fikrlar mavjud edi.
Biroq mahalliy duradgor Rene Bruns bu vaziyatga boshqacha yondashdi. Uning taklifiga ko‘ra, daraxt tanasidan jamoaviy kutubxona yaratish mumkin edi.
Shu maqsadda u daraxtni qayta ishladi va unga yangi hayot berdi. Bruns bir nechta kichik bo‘lmachalar yasab, ularni suvga chidamli shisha eshiklar bilan yopdi hamda apelsin rangga bo‘ydi, natijada ajoyib ko‘rinish hosil bo‘ldi.
Loyihani amalga oshirish uchun u taxminan uch oy vaqt sarfladi. Mehnat natijasi qishloq ahlini xursand qildi — yangicha “ochiq osmon ostidagi kutubxona” ochildi.
Qishloq aholisi uylaridan turli kitoblar, bolalar uchun asarlar, qo‘llanmalar va hikoyalarni olib kelib, kutubxona javonlarini to‘ldirishdi. Bu tashabbus nafaqat yoshlar, balki kattalar uchun ham ma’naviy dam olish, bilim olish va o‘zaro muloqot joyiga aylandi.
Hozirda Ruurlodagi ushbu daraxt kutubxonasi qishloqning eng sevimli maskanlaridan biriga aylangan. U kitobxonlikni rivojlantirish bilan birga, atrof-muhitni muhofaza qilish va ijtimoiy hamjihatlikni mustahkamlashga xizmat qilmoqda.
