Shimoliy Koreyada filmlar uchun qatl jazosiga boshlandi
Birlashgan Millatlar Tashkiloti hisobotida Shimoliy Koreya hukumati xorijiy filmlar va seriallarni tomosha qilgan yoki tarqatgan fuqarolarni qatl qilishni boshlagani haqida ma’lumot berilgan. Bu haqida Zamin.uz xabar berdi.
Qochqinlarning so‘zlariga ko‘ra, 2020-yildan buyon bunday odamlar jamoat oldida otib o‘ldirilmoqda. Hisobotda mamlakatdagi aholi ustidan nazorat kuchaygani hamda erkinliklar cheklangani ta’kidlangan.
Aholi mustaqil savdo bilan shug‘ullanolmaydi, chegaradan chiqish esa deyarli imkonsiz hisoblanadi. Qochqinlar Kim Chen In hokimiyatga kelganda hayot yaxshilanadi, degan umidda bo‘lganini bildirgan.
Biroq yadro dasturiga ko‘proq e’tibor qaratilishi tufayli turmush sharoitlari yanada og‘irlashgan va oziq-ovqat topish qiyinlashgan. BMT hisobotida Shimoliy Koreyada majburiy mehnat va qamoq lagerlari hali ham mavjudligi qayd etilgan.
Tashkilot Pxenyandan qatl jazolarini to‘xtatishni va fuqarolarga ko‘proq huquq berishni talab qilmoqda. Bu holat inson huquqlari va erkinliklari sohasida jiddiy muammolar mavjudligini ko‘rsatmoqda.
