Malayziyada o‘quvchi o‘g‘irlanishni soxtalashtirdi

Malayziyada maktabga bormaslik uchun o‘zining o‘g‘irlanganini soxtalashtirgan o‘quvchi holati jamoatchilik orasida katta muhokamalarga sabab bo‘ldi. Bu haqida Zamin.uz xabar berdi.

World of Buzz nashri xabar berishicha, o‘smir o‘qishga borishni istamasligi uchun o‘g‘irlanganligi haqida yolg‘on ariza bergan. Bola va uning otasi politsiyaga murojaat qilib, maktabga ketayotgan paytda kimdir uni o‘g‘irlamoqchi bo‘lganini aytishgan.

Tergov jarayonida esa bu voqea rost emasligi, hammasi o‘ylab topilganligi aniqlangan. Huquq-tartibot organlari bosimi ostida o‘smir haqiqatni tan oldi.

U uyda qolish uchun otasini ishontirish maqsadida bunday yolg‘on gaplarni aytganini bildirdi. Politsiya vakillaridan biri bolaning maktabga borishni xohlamasligining sababini poyabzalining iflos bo‘lishi bilan izohladi.

Hodisa jiddiy ko‘rinishiga qaramay, bolaning yoshi va holati inobatga olinib, unga nisbatan jinoyat ishi ochilmadi. Buning o‘rniga bola va uning otasiga rasmiy ogohlantirish berildi.

Politsiya jamoatchilikni, xususan ota-onalarni bolalarga bunday harakatlarning oqibatlarini tushuntirishga chaqirmoqda. Soxta bayonotlar politsiya resurslarini behuda sarflashga olib keladi va voyaga yetmaganlar uchun huquqiy muammolarni keltirib chiqarishi mumkin.

Shuningdek, Toshkent viloyati Yuqori Chirchiq tumanida ham shunga o‘xshash o‘g‘irlanish haqidagi soxta xabarlar tarqalgan edi, ammo hokimiyat va IIBB bunday voqea yuz bermagani haqida ma’lumot bergan.