So‘nggi yillarda Argentina hukumati xorijliklar orasida keng tarqalgan “tug‘ruq turizmi” amaliyotiga qat’iy cheklovlar joriy qildi. Bu haqida Zamin.uz xabar berdi.
Bu haqda Argentina Respublikasining Rossiyadagi elchisi Enrike Ignasio Ferrer Viyeyra Rossiya ommaviy axborot vositalariga bergan intervyusida ma’lum qildi. Diplomatning ta’kidlashicha, endilikda Argentina hududida tug‘ilgan bolalar ota-onasi avtomatik ravishda mamlakat fuqaroligiga ega bo‘la olmaydi.
Fuqarolik faqat naturalizatsiya tartibi orqali beriladi. Bunda shaxs 18 yoshdan katta bo‘lishi, Argentinada doimiy yashash joyiga ega ekanligini hujjatlar bilan tasdiqlashi va kamida ikki yil davomida qonuniy ravishda mamlakatda yashashi talab etiladi.
Ilgari ayrim xorijliklar, jumladan rossiyalik fuqarolar, vizasiz Argentinaga kirib, homiladorligini yashirib, davlatning bepul tibbiyot va ijtimoiy xizmatlaridan foydalangan holda farzand tug‘ilgandan keyin mamlakatni tark etgan. Shu sababli hukumat ushbu tartibni o‘zgartirishga majbur bo‘ldi.
Rasmiy statistik ma’lumotlarga ko‘ra, 2022–2023-yillar davomida Argentinaga 23 mingdan ortiq rossiyalik kirib kelgan. Ularning aksariyati mamlakat fuqaroligini olishni maqsad qilgan bo‘lsa-da, ko‘pchiligi uzoq muddat qolmagan.
2023-yilda esa Rossiyadan kelganlarga berilgan yashash ruxsatnomalari soni rekord darajaga, ya’ni 3700 taga yetdi. Argentina hukumati migratsiya siyosatini qayta ko‘rib chiqish orqali davlatning ta’lim, sog‘liqni saqlash va ijtimoiy himoya tizimlaridan noqonuniy foydalanishning oldini olishga harakat qilmoqda.
Shu bilan birga, qonuniy ravishda mamlakatda yashashni istagan shaxslarni qo‘llab-quvvatlash siyosati davom ettiriladi. Bundan tashqari, ilgari Argentinada tug‘ilgan bolaning ota-onalari pasport olishning soddalashtirilgan tartibidan foydalanib, fuqarolikka ariza topshirishda kutish shartidan ozod edi.
Endilikda bu imkoniyat ham bekor qilindi. Argentina pasporti xalqaro miqyosda yuqori darajada qadrlanadi va 170 dan ortiq davlatga vizasiz sayohat qilish imkonini beradi.
Shu sababli so‘nggi yillarda ushbu hujjatni olishga qiziqish sezilarli darajada oshgan edi.
